بھارت کی ریاست گجرات کے شہر راجکوٹ میں گیم زون میں آگ لگنے سے کم از کم 25 افراد ہلاک ہو گئے ہیں۔

مغربی ریاست گجرات کے شہر راجکوٹ میں ایک عمارت میں آگ کے شعلے اور دھواں بلند دیکھا جا سکتا ہے، مقامی میڈیا کے مطابق ہلاک ہونے والوں میں زیادہ تر بچے ہیں۔

دھواں 3 کلومیٹر کی دوری سے دکھائی دے رہا تھا، آگ لگنے کی وجہ تاحال معلوم نہیں ہو سکی ہے۔ فائر بریگیڈ افسر نے بتایا کہ ایک گیم زون کی عمارت کی چھت کا ایک ڈھانچہ گرجانے کی وجہ سے انہیں بچاؤ کے کام میں مشکلات کا سامنا ہے۔

بعض اطلاعات کے مطابق گیم زون سے 15 سے 20 بچوں کو بچایا گیا ہے۔

ریسکیو حکام کا کہنا ہے کہ آگ پر اب قابو پا لیا گیا ہے اور تلاش شروع کردی گئی ہے۔ خدشہ ہے کہ مزید متاثرین ملبے تلے دبے ہوسکتے ہیں جن میں بچے بھی شامل ہیں۔

مقامی پولیس کا کہنا ہے کہ بھاری طور پر جلی ہوئی لاشوں کی شناخت مشکل ثابت ہوئی ہے۔

آگ لگنے کی وجہ ابھی تک معلوم نہیں ہوسکی ہے۔ گجرات کے وزیر اعلی ٰ بھوپیندر پٹیل نے کہا کہ ایک خصوصی تحقیقاتی ٹیم تشکیل دی گئی ہے۔

بھارتی وزیر اعظم نریندر مودی نے راجکوٹ میں آتشزدگی پر شدید دکھ کا اظہار کرتے ہوئے کہا ہے کہ ان کی ہمدردیاں ان لوگوں کے ساتھ ہیں جنہوں نے اپنے پیاروں کو کھو دیا ہے۔