کرغزستان میں پھنسے 30 پاکستانی طلباء کو لے کر پرواز لاہور ایئرپورٹ پہنچ گئی ہے۔

وفاقی وزیر داخلہ محسن نقوی خصوصی طور پر لاہور ایئرپورٹ پہنچے اور بشکیک سے آنے والے طلباء سے ملاقات کی اور ان کی خیریت دریافت کی۔

اس موقع پر چیف آپریٹنگ آفیسر لاہور ایئرپورٹ اور دیگر اعلیٰ حکام بھی موجود تھے۔

بول نیوز کے مطابق پرواز کے اے 574 میں 30 پاکستانی طلبا سمیت 180 مسافر سوار تھے، جبکہ کرغزستان میں پھنسے مزید طلبا کو لانے کے لیے خصوصی پروازیں کل بھی چلائی جائیں گی۔

وفاقی وزیرداخلہ محسن نقوی نے طلبہ سے پیش آنے والے افسوسناک واقعے سے متعلق معلومات لیں اور مسائل پوچھے۔

انہوں نے کہا کہ دیگر شہروں سے تعلق رکھنے والے  طلبہ کو ٹرانسپورٹ کی سہولت دی جائے گی، کرغزستان میں پاکستانی طلبہ قوم کے بچے ہیں۔

وفاقی وزیر داخلہ نے کہا کہ وزیراعظم نے اس واقعہ کے فوری بعد پاکستانی طلبہ کے تحفظ کے لئے تیزی سے اقدامات کئے، اللہ تعالٰی کا شکر ہے کہ اپ بحفاظت وطن واپس آنے۔

محسن نقوی نے کہا کہ کرغزستان میں موجود دیگر طلبہ کو بھی پاکستان واپس لایا جائے گا، ہماری سب سے پہلے ترجیح پاکستانی طلبہ کی بحفاظت وطن واپسی ہے۔

ان کا کہنا تھا کہ وزیر اعظم کی خصوصی ہدایت پر وفاقی وزراء اسحاق ڈار اور امیر مقام بھی کل کرغزستان جائیں گے۔

وفاقی وزیر داخلہ محسن نقوی نے مزید کہا کہ پاکستانی بچوں کے ساتھ کھڑے ہیں۔ انشاءاللہ کل مزید پروازوں کے ذریعے طلبہ وطن واپس لائیں گے۔