اسلام آباد: وزیراعظم شہباز شریف نے ایرانی صدر کی وفات پر ایرانی سفیر سے اظہار تعزیت کردیا۔

وزیراعظم شہباز شریف اعلیٰ سطحی وفد کے ہمراہ ایرانی سفارت خانے پہنچے، جہاں انہوں نے ایرانی صدر کی وفات پر ایران کے سفیر سے اظہار تعزیت کیا۔

وزیراعظم شہباز شریف کا کہنا تھا کہ ایرانی صدر اور وزیر خارجہ کی حادثے میں شہادت سے گہرا صدمہ پہنچا، دکھ کی اس گھڑی میں ایران کےعوام کے ساتھ دلی تعزیت کا اظہار کرتے ہیں۔

وزیراعظم نے کہا کہ ہماری ہمدردیاں اور دعائیں شہداء کےاہل خانہ اور ایرانی عوام کے ساتھ ہیں، صدر ابراہیم رئیسی ایک شاندار عالم اوربصیرت رکھنے والے رہنما تھے جب کہ پاکستان نے آج اعلیٰ خصوصیات کا مالک بھائیوں جیسا دوست کھودیا ہے۔

شہباز شریف کا کہنا تھا کہ صدر رئیسی کی پاک ایران تعلقات اورخدمات کو ہمیشہ یاد رکھا جائے گا،صدر رئیسی کے دورہ پاکستان نے دو طرفہ تعلقات کو مزید مضبوط کیا ہے۔

وزیراعظم نے دعائے مغفرت کرتے ہوئے مزید کہا کہ اللہ مرحومین کو جنت میں اعلیٰ مقام عطا کرے،آمین۔

ایرانی سفیر نے مشکل کی گھڑی میں ساتھ  کھڑے ہونے پر شکریہ ادا کرتے ہوئے کہا کہ صدر رئیسی بھی وزیراعظم شہباز شریف کو ایران کا بہترین دوست سمجھتے تھے۔

ایرانی سفیر کا کہنا تھا کہ وزیراعظم شہبازشریف کے جذبات اور الفاظ کو قدر کی نگاہ سے دیکھتے ہیں، پاک ایران تعلقات کی مضبوطی و فروغ کے ویژن کو جاری رکھا جائے گا۔

اس موقع وزیراعظم شہباز شریف نے ایرانی صدر کے اعزاز میں وزیٹربک میں تعزیتی کلمات بھی درج کئے۔