کوئٹہ: بلوچستان کے قدرتی وسائل سے ہونے والے معاشی فوائد کی بلوچستان کی عوام کو منتقلی جاری ہے۔

ضلع ڈیرہ بگٹی اور سوئی کے لوگوں کیلئے وہاں سے نکلنے والی گیس سے صحت، تعلیم، روزگار، ہنر اور مختلف ترقیاتی منصوبوں کی صورت میں بے شمار منصوبے جاری ہیں۔

پاک فوج اور ایف سی بلوچستان (نارتھ) کی جانب سے ان قومی پروجیکٹس کی حفاظت کے فرائض سرانجام دیے جارہے ہیں۔

حکومت بلوچستان اور پاکستان پیٹرولیم لمیٹڈ کے اشتراک سے چلنے والا پبلک ویلفیئر اسپتال، سوئی میں مقامی افراد کو صحت کی مفت سہولیات فراہم کررہا ہے۔

پاکستان پیٹرولیم لمیٹڈ کی جانب سے سوئی اور ڈیرہ بگٹی کے لوگوں کیلئے مختلف منصوبوں پر کام جاری ہے جن میں پبلک ویلفیئر اسپتال سوئی کیلئے فنڈز کی فراہمی اور مکمل سوئی ٹاؤن کو مفت پانی کی سپلائی شامل ہے۔

علاوہ ازیں تعلیم فاونڈیشن کے اشتراک سے سوئی کے بچوں کو مفت تعلیمی سہولیات دینے کا منصوبہ، سوئی کے نوجوانوں و عورتوں کو مختلف ہنر سیکھانے کیلئے ووکیشنل ٹریننگ انسٹیٹیوٹ کا قیام سمیت ورچوئل یونیورسٹی اور سوئی کیمپس کیلئے فنڈز کی فراہمی بھی شامل ہے۔

پاکستان پیٹرولیم لمیٹڈ  1952سے بلوچستان کے علاقے سوئی میں موجود ہے۔ پی پی ایل کی جانب سے سوئی میں مختلف فلاحی منصوبوں پر کام جاری ہے۔

جنرل مینیجر پاکستان پیٹرولیم لمیٹڈ کا کہنا ہے کہ سوئی میں پی پی ایل کی جانب سے پچھلے 5 سال کے دوران تعلیم کی مد میں 1500 ملین، صحت کیلئے 1000 ملین اور سوئی ٹاؤن کو پانی کی فراہمی کیلئے 6000 ملین سے زائد کا خرچہ کیا گیا ہے۔

پی پی ایل حکام کے مطابق سوئی ویلفیئر اسپتال میں مقامی افراد کا علاج فری ہو رہا ہے۔

سوئی میں ووکیشنل ٹریننگ انسٹیٹیوٹ کے مینیجر کے مطابق سوئی میں 80 تا 90 فیصد لوگوں کے پاس فری گیس موجود ہے۔

سوئی کے قبائلی رہنما کہتے ہیں کہ ووکیشنل ٹریننگ انسٹیٹیوٹ پی پی ایل کے تعاون سے چل رہا ہے اور اس میں سوئی کے نوجوان مرد اور عورتوں کو مختلف ہنر سیکھائے جارہے ہیں۔

قبائلی رہنما نے کہا کہ امن قائم کرنے میں پاک فوج اور ایف سی نے بہت قربانیاں دی ہیں جب کہ یہ اقدامات ان تمام جھوٹے پروپیگنڈوں کی نفی کرتے ہیں کہ بلوچستان کے وسائل بلوچستان کے لوگوں پر خرچ نہیں ہورہے۔