تین بڑے اضلاع راولپنڈی، فیصل آباد اور لاہور میں پولیو مہم اختتام پذیر ہوگئی۔

تفصیلات کے مطابق راولپنڈی، فیصل آباد اور لاہور کے علاوہ  بقیہ 7 اضلاع میں انسداد پولیو مہم کا اختتام جمعے کے روز ہو گیا تھا۔

اوکاڑہ، شیخوپورہ، ملتان، ڈیرہ غازی خان ، راجن پور، رحیم یار خان اور میانوالی میں مہم کا اختتام جمعے کے روز ہو چکا ہے۔

مہم کے دوران مجموعی طور پر 89 لاکھ سے زائد بچوں کو قطرے پلائے گئے۔

لاہور میں 21 لاکھ سے زائد  اور راولپنڈی میں 8 لاکھ 64 ہزار بچوں کو قطرے پلائے گئے۔  تمام اضلاع میں 5 لاکھ مہمان بچوں کو  بھی قطرے پلائے گئے۔

مہم میں 67 ہزار پولیو ورکرز نے حصہ لیا۔ لاہور میں 13 ہزار  اور  راولپنڈی میں 6800 سے زائد ورکرز مہم کا حصہ رہے۔

پولیو مہم کے کوائف اکٹھے کیے جانے کا عمل جاری ہے۔

انسداد پولیو پروگرام سربراہ خضر افضال نے تاکید کی ہے کہ  تمام اضلاع بروقت کوائف کا اندراج یقینی بنائیں، پولیو ویکسین سے محروم بچوں کے کوائف انتہائی اہم ہیں۔

خضر افضال کا کہنا ہے کہ  ترجیحی آبادیوں کی کوریج کے کوائف بھی حاصل کیے جا رہے ہیں۔ کوائف کی روشنی میں پولیو مہم کا جائزہ لیا جائے گا۔

انہوں نے کہا کہ   تمام کوائف کا باریک بینی سے جائزہ لیا جائے گا۔ تمام ضلعی افسران کی پولیو مہم میں کارکردگی کا جائزہ لیا جائے گا۔آئندہ ہفتے پولیو مہم سے متعلق جائزہ اجلاس منعقد کیا جا رہا ہے۔

انسداد پولیو پروگرام  کے سربراہ کا کہنا ہے کہ  پولیو کا خاتمہ حکومت اور محکمہ صحت کی اولین ترجیح ہے۔

مہم کا انعقاد لاہور، راولپنڈی، فیصل آباد اور ملتان میں کیا گیا۔

راجن پور، ڈیرہ غازی خان، رحیم یار خان، میانوالی، شیخوپورہ اور اوکاڑہ بھی مہم کا حصہ تھے۔

راولپنڈی، شیخوپورہ، میانوالی میں مہم منتخب یونین کونسلوں  میں منعقد کی گئی۔