بھارتی میڈیا نے سنگاپور حکام کے حوالے سے بتایا ہے کہ سنگاپور ایئرلائنز کے طیارے میں کشش ثقل میں تبدیلی کی وجہ سے دوران پرواز جھٹکے لگے تھے۔

سنگاپور کی وزارت ٹرانسپورٹ کی جانب سے کی جانے والی ابتدائی تحقیقات میں کہا گیا ہے کہ سنگاپور ایئرلائنز کی فلائٹ دوران پرواز 178 فٹ کی بلندی پر پہنچنے کے بعد نیچے آنے کی کوشش میں جھٹکے لگے تھے۔

واضح رہے کہ 21 مئی کو لندن کے ہیتھرو ایئرپورٹ سے سنگاپور جانے والے بوئنگ 777 طیارے میں اس وقت خوف و ہراس پھیل گیا تھا جب دوران پرواز شدید جھٹکے لگنے سے 73 سالہ برطانوی شہری دل کا دورہ پڑنے سے ہلاک اور درجنوں زخمی ہوگئے تھے۔

طیارے میں 211 مسافر اور عملے کے 18 ارکان سوار تھے اور اسے بنکاک میں ہنگامی لینڈنگ کرنا پڑی تھی۔

سنگاپور کی وزارت ٹرانسپورٹ کا کہنا ہے کہ امریکی نیشنل ٹرانسپورٹیشن سیفٹی بورڈ، فیڈرل ایوی ایشن ایڈمنسٹریشن اور بوئنگ سمیت تفتیش کاروں نے طیارے کے ڈیٹا اور کاک پٹ وائس ریکارڈرز کے ابتدائی تجزیے کی بنیاد پر واقعات کی تاریخ مرتب کی ہے۔

وزارت نے کہا کہ ابتدائی نتائج سے پتہ چلتا ہے کہ طیارہ 37,000 فٹ کی بلندی پر میانمار کے جنوب سے گزر رہا تھا جب اس نے کشش ثقل کی قوت میں تبدیلی کی وجہ سے ارتعاش کا سامنا کرنا پڑا۔

اس کے بعد طیارہ 37 ہزار 362 فٹ کی بلندی پر پہنچ گیا اور ممکنہ طور پر اپ ڈرافٹ کی وجہ سے اس کی رفتار میں اضافہ ہوا۔ اس کے بعد طیارے کے آٹو پائلٹ نے جیٹ کو اس کی ابتدائی اونچائی پر نیچے کی طرف دھکیلنے کی کوشش کی۔