انگلش کپتان جوز بٹلر کے گھر نئے مہمان کی آمد متوقع ہے جس کے باعث وہ پاکستان کے خلاف تیسرا ٹی ٹوئنٹی نہیں کھیل سکیں گے۔

پاکستان اور انگلینڈ کی ٹیموں کے درمیان 4 ٹی ٹوئنٹی میچز پر مشتمل سیریز کھیلی جارہی ہے جب کہ انگلینڈ کو سیریز میں 1-0 کی برتری حاصل ہے۔

سیریز کا پہلا میچ بارش کی نذر ہوگیا تھا جب کہ دوسرے میچ میں پاکستان کو 23 رنز سے شکست کا سامنا کرنا پڑا۔

دوسرے میچ میں انگلش ٹیم کی قیادت کے بعد جوز بٹلر انگلینڈ روانہ ہوگئے ہیں جب کہ انگلش کپتان کے گھر نئے مہمان کی آمد متوقع ہے جس کے باعث وہ پاکستان کے خلاف تیسرا ٹی ٹوئنٹی میچ نہیں کھیلیں گے۔

جمعرات کو کھیلے جانے والے سیریز کے چوتھے و آخری میچ میں بھی جوز بٹلر کی آمد غیر یقینی ہے تاہم انگلش کپتان کا ٹی ٹوئنٹی ورلڈکپ کھیلنے کا امکان ہے اور وہ کیریبین میں ہونے والے میچز کے لیے اسکواڈ کے ساتھ روانہ ہوں گے۔

انگلش ٹیم ورلڈ کپ میں اپنے میچز کا آغاز 4 جون کو اسکاٹ لینڈ کے خلاف بارباڈوس میں ہونے والے میچ سے کرے گی۔

انگلینڈ کرکٹ ٹیم کے نائب کپتان معین علی کا جوز بٹلر کی غیر موجودگی پر کہنا ہے ’’اگر ان کی غیر موجودگی میں مجھے کپتان بنایا جاتا ہے تو یہ میرے لیے بہت اعزاز کی بات ہوگی اور جب جوز بٹلر واپس آئیں گے تو وہ دوبارہ قیادت سنبھال لیں گے‘‘۔

خیال رہے کہ جوز بٹلر نے پاکستان کے خلاف دوسرے میچ میں اوپننگ کرتے ہوئے 8 چوکوں اور 3 چھکوں کی مدد سے 51 گیندوں پر 84 رنز کی اننگز کھیلی تھی۔

جوز بٹلر کی غیر موجودگی میں بین ڈکٹ کو ٹیم میں شامل کیے جانے کا امکان ہے جب کہ ول جیکس یا جونی بیرسٹو میں سے کوئی ایک فل سالٹ کے ساتھ اوپپنگ کریں گے۔