اسلام آباد: وزیر اعظم محمد شہباز شریف سے قطر کے وزیر مملکت برائے خارجہ امور عزت مآب ڈاکٹر محمد بن عبدالعزیز الخلیفی نے آج وزیر اعظم ہاؤس میں ملاقات کی۔

وزیراعظم شہباز شریف سے قطر کے وزیر مملکت برائے خارجہ امور محمد بن عبدالعزیز الخلیفی نے ملاقات کی جس دوران وزیر اعظم نے کہا کہ پاکستان قطر کے ساتھ اپنے تاریخی، دوستانہ اور برادرانہ تعلقات کو بہت اہمیت دیتا ہے۔

وزیراعظم نے کہا کہ دونوں ممالک نے ہمیشہ ایک دوسرے کا ساتھ دیا ہے، پاکستان قطر کے ساتھ اپنے بہترین تعلقات کو باہمی طور پر فائدہ مند اور مضبوط اقتصادی شراکت داری میں تبدیل کرنے کا خواہاں ہے۔

ان کا کہنا تھا کہ دونوں ممالک کو باہمی دلچسپی کے تمام شعبوں بالخصوص تجارت اور سرمایہ کاری میں دوطرفہ تعاون کو مضبوط بنانے کے لیے مل کر کام جاری رکھنا چاہیے۔

شہباز شریف کہتے ہیں کہ پاکستان چاہتا ہے کہ قطر ترجیحی شعبوں میں اپنی سرمایہ کاری کے  پورٹ فولیو کو بڑھائے، ایس آئی ایف سی ہم آہنگی کو یقینی بنائے گی اور تمام تر سہولیات فراہم کرے گی۔

قطری وزیر مملکت نے اپنے استقبال پر وزیراعظم کا شکریہ ادا کیا اور قطر کی قیادت کا خصوصی پیغام پہنچایا جب کہ قطر نے دو طرفہ تعلقات کو مزید مضبوط بنانے اور پاکستان میں سرمایہ کاری میں گہری دلچسپی کا اظہار کیا۔