کراچی: پی آئی اے کی نجکاری کے لیے بولیوں کی طلبی کی تاریخ میں توسیع کا امکان ہے۔

نجکاری ڈویژن کے ذرائع کے مطابق پی آئی اے کی نجکاری کے لیے بولیوں کی طلبی کی کل آخری تاریخ ہے تاہم پی آئی کی نجکاری میں دلچسپی کی بولیاں تین مئی تک جمع کرانے کی تاریخ میں توسیع کا امکان ظاہر کیا جارہا ہے۔

نجکاری ڈویژن کے ذرائع کا کہنا ہے کہ پی آئی اے نجکاری کی بولیوں کی وصولی کی تاریخ میں 15 دن کی توسیع کا امکان ہے، نجکاری ڈویژن کو پی آئی اے کی نجکاری کے حوالے سے خاطر خواہ بولیاں موصول نہ ہوئی ہیں۔

ذرائع نے بتایا کہ نجکاری ڈویژن مزید بولیوں کے لئے تاریخ میں توسیع کررہا ہے، نچکاری سے قبل اس کے تمام نقصانات اور قرضہ جات ہولڈنگ کمپنی میں منتقل کئے گئے تاہم وفاقی حکومت پی آئی اے کا صرف ہوا بازی شعبہ نجی تحویل میں دینا چاہتی ہے۔

وزارت نجکاری ڈویژن کا کہنا تھا کہ پی آئی اے کے 51 فیصد شیئرز نجی تحویل میں دیے جائیں گے،  پی آئی اے کے 49 فیصد شیئرز حکومت پاکستان کی ملکیتت ہوں گے۔

حکام کا کہنا ہے کہ پی آئی اے کے اکثریتی شیئرز نجی تحویل میں جانے سے انتظامی کنٹرول بھی نجی کمپنی کا ہوگا۔