مظفر آباد: چیئرمین آزاد جموں و کشمیر بورڈ آف انویسٹمنٹ سردار امجد جلیل نے استعفیٰ دے دیا۔

آزادکشمیر کی موجودہ سیاسی صورت حال پر چیئرمین آزاد جموں و کشمیر بورڈ آف انویسٹمنٹ سردار امجد جلیل نے استعفیٰ دے دیا ہے۔

سردار امجد جلیل کا کہنا ہے کہ آزاد کشمیر کی موجودہ سیاسی صورت حال پر مجھے بہت دکھ اور افسوس ہورہا ہے، گزشتہ ایک سال سے آزاد کشمیر جوائنٹ ایکشن کمیٹی کے ساتھ فٹ بال کھیلا جارہا تھا۔

انہوں نے کہا کہ موجودہ صورت حال کی ذمہ داری وزیراعظم آزاد کشمیر اور ان کی کابینہ پر عائد ہوتی ہے، وزیر اعظم آزاد کشمیر کی ہٹ دھرمی اور ان کی کابینہ کی عدم دلچسپی کے باعث یہ حالات پیدا ہوئے۔

ان کا کہنا تھا کہ آزاد کشمیر ایک پرامن خطہ تھا یہاں خون کی ہولی کھیلی جارہی ہے جب کہ وزیر اعظم آزاد کشمیر نے عوام اور پولیس کو آمنے سامنے لا کر کھڑا کردیا ہے۔

سردار امجد جلیل نے جوائنٹ ایکشن کمیٹی سے اپیل کرتے ہوئے کہا کہ پرامن احتجاج کریں، آزاد کشمیر کے غریب لوگ بجلی اور آٹے کے لئے احتجاج کررہے ہیں جب کہ آزاد کشمیر حکومت کا کام بنتا ہے کہ عوام کو ریلیف دیں۔

چیئرمین آزاد جموں و کشمیر بورڈ آف انویسٹمنٹ نے مزید کہا کہ اپنے ذاتی خرچے پر غیرملکی سرمایہ کاروں کو آزاد کشمیر میں سرمایہ کاری کے لئے قائل کیا لیکن وزیر اعظم آزاد کشمیر کی عدم دلچسپی، ضد اور عناد کے باعث اپنے خواب کو پورا نہیں کرسکا۔

چیئرمین بورڈ آف انوسٹمنٹ سردار امجد جلیل نے اپنا استعفیٰ وزیراعظم چوہدری انوار الحق کو بھجوا دیا ہے۔