وفاقی وزیر انجنئیر امیر مقام نے کہا ہے کہ کے پی حکومت نے اپنی مشہوری کے لیے بجٹ پیش کیا ہے۔

بول نیوز کے پروگرام ’بس بہت ہو گیا‘ میں گفتگو کرتے ہوئے سینئیر لیگی رہنما اور وفاقی وزیر امیر مقام کا کہنا تھا کہ علی امین کہتا ہے کہ گرڈ اسٹیشن پر قبضہ کر لوں گا، ان کا مفروضوں پر بجٹ پیش کرنا عوام کی توہین ہے۔

امیر مقام نے کہا کہ قبضہ کریں گے تو بجلی بند ہو جائے گی اور نقصان عوام کا ہوگا۔

وفاقی وزیر نے کہا کہ ان کی غیر سنجیدگی دیکھیں بھڑکیں مارنے کے بعد وزیر داخلہ کےساتھ بیٹھےتھے۔

مسلم لیگی رہنما کا کہنا تھا کہ مجھے تعجب ہے کہ خیبر پختونخوا نے پی ٹی آئی کو تیسری بار مینڈیٹ دیا، علی امین کو چاہیئے کہ وزیر اعلیٰ پنجاب مریم نواز کی پیروی کریں۔

ان کا کہنا تھا کہ شہبازشریف کی خواہش تھی کہ نوازشریف وزیراعظم بنیں، اس مینڈیٹ کےساتھ نوازشریف وزیراعظم نہیں بننا چاہتے تھے وہ اپنےفیصلے کو بہتر سمجھتے ہیں۔

بول نیوز  کے پروگرام ’بس بہت ہو  گیا‘ کی اینکر پرسن کے ایک سوال کے جواب میں امیر مقام کا کہنا تھا کہ پہلے دن سے کہا تھا جو حکومت بنانا چاہے بنا لے۔

ان کا کہنا تھا کہ مخالف جو بھی کہیں ملک میں بہتری آ رہی ہے، ملک میں سرمایہ کاری میں آرمی چیف کا بہت بڑا کردار ہے، پی ڈی ایم حکومت میں ن لیگ نے ملک کو ڈیفالٹ سے بچایا۔

امیر مقام نے کہا کہ پی ٹی آئی جن سے بات کرنا چاہتی ہے وہ جواب دے چکے ہیں۔

انہوں نے کہا کہ جھوٹی خبر کو کنٹرول کرنے کے لیے قانون ہونا چاہئے، کرغز مصری لڑکوں کی لڑائی کو سوشل میڈیا پر بڑھا چڑھا کر پیش کیا گیا وہاں کوئی قتل نہیں ہوا لیکن سوشل میڈیا پر لاشیں دکھائی گئیں، سوشل میڈیا پر جذباتی ماحول بنا کر پیش نہیں کرنا چاہیئے۔

ان کا کہنا تھا کہ سوشل میڈیا پر جھوٹی خبر چلے تو کوئی پوچھے بھی نہیں تو کیا انجام ہوگا؟ جھوٹی خبر کو کنٹرول کرنا ملکی مفاد میں ہے، جھوٹی خبر اور ویڈیو کی روک تھام ضروری ہے، جھوٹ سے نجات ملنے پرعوام خوش ہوں گے۔

ایک سوال کے جواب میں وفاقی وزیر امیر مقام کا کہنا تھا کہ مولانا فضل الرحمان، نوازشریف کے دوست ہیں، مولانا فضل الرحمان سے ان کے دیرینہ تعلق ہے، پی ٹی آئی اور جے یو آئی کا مل کر احتجاج کرنا نا ممکن ہے۔