لاہور: 9 مئی کے حوالے سے اپوزیشن نے بھی پنجاب اسمبلی میں قرارداد جمع کرادی۔

9 مئی کے حوالے سے اپوزیشن نے بھی پنجاب اسمبلی میں قرارداد جمع کرادی ہے جب کہ قرارداد اپوزیشن لیڈر ملک احمد خان بھچر اور دیگر ارکان کے دستخطوں سے جمع کرائی گئی ہے۔

 قرارداد میں سانحہ نو مئی کی تحقیقات کے لئے جوڈیشل کمیشن کی تشکیل کا مطالبہ کیا گیا جب کہ متن میں کہا گیا ہے کہ نومئی کو ایک سال  گزرنے کے باوجود حقائق منظر عام پر نہیں آسکے ہیں۔

متن میں مزید کہا گیا ہے کہ ایک سال سے اس سانحہ کو سیاسی مقاصد کے لئے استمعال کیا جارہا ہے جب کہ  آج تک یہ سوال ہے کہ اس سانحہ میں نگران حکومت اورپولیس کا کیا کردار ہے۔

دوسری جانب مسلم لیگ ن کی ایم پی اے راحیلہ خادم حسین نے بھی پنجاب اسمبلی میں سانحہ نو مئی پر قرارداد جمع کروائی ہے۔

راحیلہ خادم حسین نے قرارداد میں موقف اختیار کیا کہ انتشاری ٹولہ عوام کے سامنے بے نقاب ہوچکا ہے اور انتشاری ٹولہ کا سربراہ مسلسل ریاست کے خلاف زہر اگل رہا ہے۔

قرارداد کے متن میں کہا گیا ہے کہ ریاست کو نشانہ بنانا، نو مئی کو غیر ملکی ایجنٹوں کی ایماء پر حملہ آور اور شہداء کے مجسموں کی بے حرمتی اور حساس تنصیبات کو جلانے کے عمل کی قوم مذمت کرتی ہے۔

متن میں مزید کہا گیا ہے کہ ایسے کرداروں کو کسی طور پر ملکی سیاست میں حصہ لینے کی پابندی ہونی چاہیے جب کہ کالعدم مذہبی گروہ سیاست نہیں کرسکتا۔