وزیراعظم نے کہا ہے کہ کسانوں کو انکی محنت کا معاوضہ بروقت پہنچائیں گے، کسانوں کے معاشی تحفظ پر کسی قسم کا سمجھوتہ قبول نہیں۔ 

ملک میں گندم کی مجموعی صورتحال کے معاملے میں وزیراعظم شہباز شریف کی زیر صدارت ان کی رہائش پر اجلاس ختم ہو گیا۔

اجلاس میں وفاقی وزیراطلاعات و نشریات عطاء اللہ تارڑ، وفاقی وزیر رانا تنویر، ایم ڈی پاسکوعماد نذیر احمد اور سیکرٹری فوڈ معظم اقبال شریک تھے۔

وزیر اعظم شہباز شریف ملک میں گندم کے بحران کی رپورٹ قائد نواز شریف کو کل پیش کریں گے۔

ذرائع نے بتایا کہ سیکریٹری فوڈ کی وزیراعظم شہباز شریف کو گندم کی خریداری کے حوالے سے تفصیلی بریفگ دی گئی۔ اجلاس میں گندم کی بحران کے حل کے حوالے سے غورکیا گیا۔

ذرائع کا کہنا ہے کہ کسانوں کی مشکلات حل کرنے اوران کو ریلیف دینے کے طریقہ کار پر بھی غور کیا گیا۔

وزیرِاعظم محمد شہباز شریف نے گندم کی خریداری پر پیش رفت اور بار دانے کے حصول میں کسانوں کو درپیش مشکلات کا نوٹس لیا۔

وفاقی حکومت کے تحت پاسکو کے ذریعے گندم کے معاملات پر جائزہ اجلاس میں وزیراعظم نے استفسارکیا کہ گندم کی خریداری کیلئے کسانوں کو بار دانے کے حصول میں مشکلات کیونکر درپیش ہیں؟

وزیراعظم نے کہا کہ کسانوں کو انکی محنت کا معاوضہ بروقت پہنچائیں گے، اللہ کے فضل و کرم سے رواں سال گندم کی بمپر فصل ہوئی ہے۔ کسانوں کی محنت کو کسی کی غفلت کی بھینٹ نہیں چڑھنے دونگا۔ کسانوں کے معاشی تحفظ پر کسی قسم کا سمجھوتہ قبول نہیں۔

وزیراعظم شہبازشریف نے ہدایت کی کہ افسران گندم کی خریداری کی موقع پر جا کر خود نگرانی کریں، وفاقی حکومت پاسکو کے تحت 1.8 ملین میٹرک ٹن گندم کی خریداری کرنے جارہی ہے جس کا مقصد کسانوں کو بھرپور فائدہ پہنچانا ہے۔

وزیرِاعظم نے گندم کی خریداری کے حوالے سے کسانوں کی سہولت یقینی بنانے اور انکے تحفظات دور کرنے کیلئے وزارت قومی غذائی تحفظ کی کمیٹی قائم کردی جو چار روز میں کسانوں کے تحفظات دور کرنے کیلئے اقدامات کرے گی۔

اجلاس میں گندم کی خریداری کے حوالے سے پیش رفت پر تفصیلی طور آگاہ کیا گیا۔