پاکستان مسلم لیگ ن کے صدر نواز شریف آج بلامقابلہ پارٹی صدر کا عہدہ سنبھالتے ہی متحرک ہو گئے ہیں۔

پارٹی ذرائع کے مطابق نواز شریف کی ہدایت پر وزیراعظم شہباز شریف نے آئندہ مالی سال کے بجٹ کے حوالے سے مشاورتی اجلاس طلب کر لیا۔

پی ایم ایل ن کے ذرائع کے مطابق اجلاس کل صبح 11 بجے جاتی امرا رائیونڈ میں ہو گا، اجلاس کی صدارت وزیراعظم شہباز شریف اور پارٹی صدر نواز شریف مشترکہ طور پر کرینگے۔

اجلاس میں وفاقی وزراء، پارٹی کی سینئر قیادت کی شرکت متوقع ہے جبکہ اجلاس میں وزیراعلی پنجاب مریم نواز کی شرکت کا بھی امکان ہے۔

پارٹی ذرائع کا کہنا ہے کہ اجلاس میں وفاقی و صوبائی سطح پر عوام کو پر ممکن ریلیف دینے کے حوالے سے اقدامات بارے تجاویز لی جائیں گی۔

اجلاس میں شرکت کرنے والے وفاقی وزرا کو اپنے اپنے محکموں کی جانب سے ممکنہ ریلیف اقدامات کی تجاویز ساتھ لانے کی ہدایت کی گئیں ہیں۔

پارٹی ذرائع کے مطابق پارٹی قائدین کو عوامی مشاورت سے ممکنہ ریلیف بارے اپنی اپنی تجاویز تیار کروا کر ساتھ لانے کی ہدایت کی گئی ہے۔

اجلاس میں وفاقی وزیر خزانہ محمد اورنگزیب، وزیر پٹرولیم ڈاکٹر مصدق ملک اور وزیر بجلی اویس لغاری کے علاوہ وفاقی وزرا رانا تنویر، جام کمال، احد چیمہ اور نائب وزیراعظم اسحاق ڈار کی بھی شرکت متوقع ہے۔

پارٹی ذرائع کا کہنا ہے کہ نواز شریف بجٹ مشاورتی اجلاس میں اپنے وسیع تر سیاسی و انتظامی تجربے کی بنیاد پر ہدایات بھی جاری کریں گے۔

پارٹی ذرائع کا مزید کہنا تھا کہ نواز شریف کی کل کے اجلاس میں وزیراعلی پنجاب مریم نواز کو صوبائی حکومت کی جانب سے بھرپور ریلیف فراہم کرنے کے اقدامات تجویز کرنے کی ہدایت کی گئی ہے۔