رؤف حسن کا کہنا ہے کہ لگتا ہے بانی پی ٹی آئی کو مزید وقت جیل میں گزارنا ہوگا، کوشش کی جارہی ہے کہ چوتھا مقدمہ بنا کر سزا دلوائی جائے۔

پاکستان تحریک انصاف کے ترجمان رؤف حسن نے نیوز کانفرنس کرتے ہوئے کہا کہ آج جج پر دباؤ ڈالا گیا تھا، خاورمانیکا نے بانی پی ٹی آئی کےلیے غلط زبان استعمال کی، گرمیوں کی چھٹیوں کے بعد کیس لگے گا۔

رؤف حسن نے کہا کہ کیس دوسرے جج کے پاس چلا گیا، توشہ خانہ کیس میں سزا معطل ہوچکی، توشہ خانہ کیس میں چوتھا مقدمہ بنانے کی تیاریاں جاری ہیں، کوشش کی جارہی ہے کہ چوتھا مقدمہ بنا کر سزادلوائی جائے۔

ترجمان پی ٹی آئی نے کہا کہ شاہ محمود سائفرکیس میں رہا ہوجاتے ہیں، دیگرمیں جیل میں رہیں گے، ہر گزرتے دن ریاستی اداروں پر اسٹیبلشمنٹ کا دباؤبڑھتا جارہا ہے، انصاف کا قتل اور ریاست کو کمزور ہوتا دیکھ رہےہیں۔

رؤف حسن نے کہا کہ جج پر فیصلہ نہ سنانے کے لیے دباؤ ڈالا گیا، کوشش کی جارہی ہے کہ کیسز کے فیصلے نہ آئیں، نکاح کیس میں بانی پی ٹی آئی اور اہلیہ کو نشانہ بنایا گیا، ان کی پوری کوشش ہے کہ بانی پی ٹی آئی باہر نہ آئیں۔

ترجمان پی ٹی آئی نے کہا کہ اسٹیبلشمنٹ کی مداخلت کی وجہ سے ملک ترقی نہیں کرسکا، ہماری جدوجہد جاری رہے گی، جو لوگ ذمہ دارہیں انہیں حساب دینا ہوگا، لگتا ہے بانی پی ٹی آئی کو مزید وقت جیل میں گزارنا ہوگا۔

رؤف حسن نے کہا کہ بانی پی ٹی آئی کو اب تک جیل سے باہر آجانا چاہئے تھا، خدشہ ہے بانی پی ٹی آئی کے خلاف مزید مقدمات بنائے جائیں گے۔