مولانا فضل الرحمان نے کہا ہے کہ حکومت مستعفی ہو،الیکشن ازسرنوہوں۔ عوام نہیں اٹھے تو مسلسل غلامی کی طرف بڑھتے رہیں گے۔

جے یو آئی ف کے سربراہ مولانا فضل الرحمان نے ملتان میں نیوز کانفرنس کرتے ہوئے کہا کہ افسوس کی بات ہےسرینگرلینے نکلے تھے مظفرآباد ہاتھ سے نکل رہا ہے، اسٹیبلشمنٹ انتخابی عمل سے دور رہے، عوام مجھے ووٹ دیں گے تو صدراور وزیراعظم بنوں گا۔

مولانافضل الرحمان نے کہا کہ ایسے الیکشن کو نہیں مانتے، دوبارہ ہونے چاہئیں، افغانستان سے معاملات خراب ہوتے جارہے ہیں، پاک افغان شاہراہوں پرکئی ماہ سے احتجاج جاری ہے، ڈی آئی خان میں مدمقابل دونوں وزیراعلیٰ اورگورنربنے ہیں، کوئی اورہوتا کون ہے مجھے وزارت عظمیٰ یا وزارت اعلیٰ کی پیشکش کرے۔

سربراہ جے یو آئی ف نے کہا کہ عوام نہیں اٹھےتو مسلسل غلامی کی طرف بڑھتے رہیں گے، نہیں ہوسکتا اسٹیبلشمنٹ ملازم بھی ہو اورحاکم بھی ہو، اس ذہنیت کوختم کرنا ہے، اسٹیبلشمنٹ کی مرضی کے بغیرکچھ نہیں ہوسکتا، حکومت مستعفی ہو،الیکشن ازسرنوہوں، پیپلزپارٹی کو جس دن پریشانی ہوئی، حکومت کو مسئلہ ہوگا۔

مولانافضل الرحمان نے کہا کہ کچھ لوگوں کواچھےعہدے مل گئے وہ انجوائے کرتےرہیں گے، پی ٹی آئی کے ساتھ ذاتی دشمنی نہیں، دیگرجماعتیں بھی دھاندلی کےخلاف تحریک کاارادہ رکھتی ہیں، ملک میں حکومت ہے ہی نہیں، مجھے نہیں لگتا کہ حکومت ڈیلیور کرسکے گی۔

انھوں نے مزید کہا کہ انتخابی نتائج پرجےیوآئی نےدوٹوک موقف اپنایا، موجودہ اسمبلی بھی مضبوط نہیں، پیپلزپارٹی بھی حکومت کا حصہ نہیں، دھاندلی کے خلاف تحریک شروع کرچکے ہیں۔