راولپنڈی: سیکیورٹی فورسز نے خیبرپختونخوا میں 2 مختلف کارروائیوں کے دوران 6 دہشت گردوں کو جہنم واصل کردیا۔

پاک فوج کے شعبہ تعلقات عامہ (آئی ایس پی آر) کے مطابق خیبرپختونخوا میں سیکیورٹی فورسز نے 2 مختلف کارروائیاں کی جس دوران 6 دہشت گردوں کو جہنم واصل کردیا گیا۔

آئی ایس پی آر کا کہنا ہے کہ پہلی کارروائی ضلع ڈیرہ اسماعیل خان میں دہشت گردوں کی موجودگی کی اطلاع پر انٹیلی جنس بیسڈ آپریشن کیا۔

ترجمان پاک فوج کے مطابق آپریشن کے دوران سیکیورٹی فورسز نے پانچ دہشت گردوں کو جہنم واصل کردیا۔

ترجمان پاک فوج نے کہا کہ شمالی وزیرستان کے ضلع میں ایک اور فائرنگ کے تبادلے میں ایک دہشت گرد انعام اللہ کو جہنم واصل کردیا گیا ہے۔

آئی ایس پی آر کا کہنا تھا کہ مارے گئے دہشت گردوں کے قبضے سے اسلحہ، گولہ بارود اور دھماکہ خیز مواد بھی برآمد ہوا ہے۔

آئی ایس پی آر نے بتایا کہ ہلاک دہشت گرد سیکیورٹی فورسز کے ساتھ ساتھ معصوم شہریوں کے خلاف دہشت گردی کی متعدد کارروائیوں میں ملوث تھے۔

ترجمان پاک فوج کا مزید کہنا ہے کہ علاقے سے دہشت گردوں کے خاتمے کے لیےکلیئرنس آپریشن جاری ہے، سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔