الیکشن کمیشن نے سپریم کورٹ کے حکم کی روشنی میں قومی اور صوبائی اسمبلیوں میں خواتین اور اقلیتوں کی 77 مخصوص نشستوں پر ارکان کی رکنیت معطل کردی۔

تفصیلات کے مطابق الیکشن کمیشن کی جانب سے مخصوص نشستوں پر ارکان کی رکنیت معطلی کا نوٹیفکیشن جاری کردیا گیا۔

الیکشن کمیشن کے نوٹیفکیشن کے مطابق قومی اسمبلی کی 22، خیبرپختونخوا اسمبلی کی 25 ، پنجاب اسمبلی کی 27 اور سندھ اسمبلی کی تین مخصوص نشستوں پر ارکان کی رکنیت تاحکم ثانی معطل کردی گئی۔

قومی اسمبلی میں خواتین کی 19 جبکہ اقلیتوں کی تین نشستوں پر ارکان کی رکنیت معطل کی گئی۔

پنجاب اسمبلی میں خواتین کی 24 اور اقلیتوں کی تین نشستوں پر ارکان کی رکنیت معطل کی گئی، خیبرپختونخوا اسمبلی میں خواتین کی 21 اور چار اقلیتی نشستوں پر ارکان کی رکنیت معطل کی گئی، سندھ اسمبلی میں خواتین کی دو اور ایک اقلیتی نشست پر ارکان کی رکنیت معطل کی گئی۔

قومی اسمبلی اور تین صوبائی اسمبلیوں سے سب سے زیادہ مسلم لیگ ن کی 44 نشتیں معطل ہوئیں۔

قومی اسمبلی سے مسلم لیگ ن کی 14، پی پی کی 5 اور جے یو آئی کی 3 نشتیں معطل کی گئی ہیں۔ خیبرپختونخوا اسمبلی سے جے یو آئی کی 10، ن لیگ  کی 7، پی پی  کی 6، اے این پی اور پی ٹی آئی پارلیمنٹرین کی ایک ایک نشست معطل ہوئی۔

پنجاب اسمبلی سے ن لیگ کی 23، پی پی  کی 2، ق لیگ اور استحکام  پاکستان پارٹی کی ایک ایک نشست معطل ہوئی۔ سندھ اسمبلی سے ایم کیو ایم کی  ایک اور پی پی کی دو نشستیں معطل ہوئیں۔

ملک بھر سے جے یو آئی کی 13 نشتیں، پی پی  کی 15 اور ایم کیو ایم کی ایک نشست معطل ہوئی جبکہ آئی پی پی ، ق لیگ، اے این پی اور تحریک انصاف پارلیمنٹرین کی بھی ایک ایک نشست معطل ہوئی۔