اقوام متحدہ کی فلسطینی پناہ گزین ایجنسی کا کہنا ہے کہ گزشتہ تین ہفتوں کے دوران 10 لاکھ افراد رفح سے نقل مکانی کر چکے ہیں۔

بہت سے فلسطینیوں نے کہا ہے کہ وہ جہاں بھی جاتے ہیں وہاں اسرائیلی حملوں کا شکار ہوتے ہیں۔

اقوام متحدہ کے فلسطینی پناہ گزینوں کے ادارے (یو این آر ڈبلیو اے) انروا نے کہا ہے کہ گذشتہ تین ہفتوں کے دوران غزہ کے شہر رفح سے تقریبا دس لاکھ افراد نقل مکانی کر چکے ہیں۔

غزہ کی پٹی کے جنوبی کنارے پر واقع یہ چھوٹا سا شہر دس لاکھ سے زائد فلسطینیوں کو پناہ دے رہا تھا جو انکلیو کے دیگر حصوں پر اسرائیلی حملوں سے فرار ہو گئے تھے۔

مئی کے اوائل سے اسرائیلی فوج رفح میں جنگجوؤں کو ہلاک کرنے اور غزہ کو چلانے والی حماس کے زیر استعمال بنیادی ڈھانچے کو تباہ کرنے کے لیے ایک محدود آپریشن کر رہی ہے۔

اسرائیل نے شہریوں سے کہا ہے کہ وہ تقریبا 20 کلومیٹر دور ایک توسیع شدہ انسانی علاقے میں جائیں۔

بہت سے فلسطینیوں نے کہا ہے کہ وہ جہاں بھی جاتے ہیں وہاں اسرائیلی حملوں کا شکار ہوتے ہیں اور گزشتہ چند ماہ سے غزہ کی پٹی کے اوپر نیچے جا رہے ہیں۔

یو این آر ڈبلیو اے کا کہنا ہے کہ رفح سے نقل مکانی کے لیے کوئی محفوظ جگہ نہیں تھی اور بمباری، خوراک اور پانی کی کمی، کچرے کے انبار اور زندگی کے ناسازگار حالات کے درمیان یہ نقل مکانی ہوئی۔

ایجنسی نے کہا کہ مدد اور تحفظ فراہم کرنا تقریبا ناممکن ہوتا جا رہا ہے۔