اسٹاک مارکیٹ کے ٹریڈنگ ہال میں موبائل کے استعمال کو روکنے کیلئے جیمرز لگانے پر غور کیا جارہا ہے۔

تفصیلات کے مطابق  سیکیورٹیز اینڈ ایکسچینج کمیشن آف پاکستان نے اسٹاک مارکیٹ میں حال ہی میں بعض شیئرز کی تجارت میں غیرمعمولی تجارت کا نوٹس لیتے ہوئے تحقیقات کا آغاز کردیا ہے۔

کونسل آف اکنامک اینڈ انرجی جرنلسٹ (سیج)کے  ممبران  نے سیکیورٹیز اینڈ ایکسچینج کمیشن  کے دورے کے موقع پر گفتگو کی۔

ایس ای سی پی کی جانب سے  اسٹاک مارکیٹ کی سرویلنس اور انسائیڈر ٹریڈنگ اور اس کی روک تھام پر تفصیلی بریفنگ دی گئی۔

کمشنر کیپٹل مارکیٹ عبدالرحمان وڑائچ نے کہا کہ  انڈیا کی طرح ہمیں بھی جدید نئے ڈیٹا مانیٹرنگ نظام کی ضرورت ہے۔ بعض شیئرز کی ٹریڈنگ میں ہیرا پھیری کی تحقیقات ہورہی ہیں۔

عبدالرحمان وڑائچ نے کہا کہ   اسٹاک ایکسچینج میں کاروبار کو شفاف بنانے  کے لیے مربوط نظام پوری طرح کام کررہا ہے۔  اسٹاک مارکیٹ کے مختلف اسٹیک ہولڈرز کو ایک ساتھ جوڑنے  کے لیے سینٹرلائزڈ گیٹ وے پورٹل کا نظام متعارف کرایا ہے۔

انہوں نے کہا کہ کیپٹل مارکیٹ میں ڈیجیٹل آن لائن اکاؤنٹ کھلوانے کی شرح بڑھ رہی ہے۔ ٹوٹل اکاؤنٹ ہولڈرز کی تعداد 4 لاکھ سے زیادہ ہے۔  بزنس ڈیٹا کی مانیٹرنگ پر ایف بی آر کو مل کر کام کرنے کا پروپوزل دیا ہے۔

ایس ای سی پی  کی جانب سے  پاکستان اسٹاک ایکس چینج، نیشنل کلیئرنگ کمپنی، اور سینٹرل ڈیپازٹری کمپنی آف پاکستان لمیٹڈ کے ٹریڈنگ، کلیئرنگ کے بارے میں  بھی بریفنگ دی گئی۔