اسلام آباد: مسلم لیگ ق کے رکن قومی اسمبلی طارق بشیر چیمہ اور زرتاج گل کے درمیان لڑائی کی وجہ سامنے آگئی ہے۔

طارق بشیر چیمہ نے جب کہا کہ بانی پی ٹی آئی نے کابینہ وزرا کو کہا کہ چاہے ان کی حکومت جاتی ہے تو چلی جائے لیکن وہ کسی وزیر کو کرپشن نہیں کرنے دیں مگر درحقیقت وہ اپنے سوا کسی کو کرپشن نہیں کرنے کا کہہ رہے تھے۔

طارق بشیر چیمہ نے بانی پی ٹی آئی پر بطور وزیر اعظم طنز کیا تو ان کے طنز پر زرتاج گل نے انہیں بہاولپور یونیورسٹی ویڈیو اسکینڈل کا طعنہ مارا۔

طارق بشیر چیمہ نے زرتاج گل کو قریب جاکر کہا آپ بہاولپور یونیورسٹی میں جاتی تھی جس پر زرتاج گل نے انہیں شٹ اپ کال دی تو طارق بشیر چیمہ نے انہیں گالی نکال دی۔

طارق بشیر چیمہ کی گالی کے بعد سنی اتحاد کونسل کے ارکان طارق بشیر چیمہ کو مارنے کے لئے بھاگے۔

دوسری جانب سنی اتحاد کونسل کے ارکان کی اسپیکر ایاز صادق سے ملاقات جاری ہے جب کہ زرتاج گل نے اسپیکر ایاز صادق کو پورا واقعہ بتادیا۔

سنی اتحاد کونسل کے رکن شاہد خٹک کا اسپیکر آفس کے باہر میڈیا سے گفتگو کرتے ہوئے کہنا تھا کہ طارق بشیر چیمہ نے زرتاج گل کو گالی دی ہے، ہم انہیں ایوان میں نہیں گھسنے دیں گے۔