جے یو آئی کے رہنما حافظ حمد اللہ نے کہا ہے کہ ہم ملک میں ازسر نو انتخابات چاہتے ہیں۔

جمعیت علمائے اسلام ف کے رہنما حافظ حمد اللہ نے کہا کہ جے یو آئی اور پی ٹی آئی کی تحریک اپنی اپنی جگہ چل رہی ہیں، ملک میں ازسر نو انتخابات چاہتے ہیں۔

انہوں نے کہا کہ موجودہ پارلیمان طاقت اور پیسے کی اسمبلی ہے، آپس میں رابطے ہونے چاہئیں، مشترکہ پلیٹ فارم پر تحریک نہ بھی ہو تو ہماری سوچ ایک ہے۔

رہنما جے یو آئی کا کہنا تھا کہ ابھی ملکر تحریک چلانے کا فیصلہ نہیں ہوا۔

ان کا کہنا تھا کہ مسلم لیگ ن اور پی پی پی، پی ڈی ایم میں اکٹھے رہی ہیں، پی ڈی ایم حکومت میں ہم سب اکٹھے تھے۔

حافظ حمد اللہ نے کہا کہ جے یو آئی کو 8 فروری کے نتائج پراعتراض ہے، پی پی اور ن لیگ کو 8 فروری کے نتائج پراعتراض نہیں ہے۔

جے یو آئی رہنما کے مطابق ن لیگ ہو یا پی پی جو بھی رابطہ کرے گی خوش آمدید کہیں گے لیکن جے یو آئی حکومت میں شامل نہیں ہو گی۔

انہوں نے کہا کہ آج ججز دباؤ کا کہہ رہے ہیں۔

رہنما جے یو آئی حافظ حمد اللہ نے مزید کہا کہ جے یو آئی کو پی ٹی آئی سے کچھ 16 سالہ تحفظات ہیں، تحفظات یہی ہیں کہ پی ٹی آئی باہر اور طاقت کے مراکز سے ڈکٹیشن لیتی رہی ہے، مشترکہ چارٹر کی صورت میں اکٹھے ہو سکتے ہیں۔