ٹی 20 ورلڈ کپ 2024 کے 8 ویں میچ میں بھارت نے یکطرفہ مقابلے میں آئرلینڈ کو 8 وکٹوں سے شکست دے دی۔

آئرلینڈ نے پہلے بیٹنگ کی اور پوری ٹیم 16 اوورز میں 96 رنز بنا کر آؤٹ ہو گئی، بھارت نے آسان ہدف 12.2 اوورز میں 2 وکٹوں کے نقصان پر حاصل کر لیا۔

آئی سی سی مینز ٹی 20 ورلڈ کپ 2024 کا 8 واں میچ نیویارک کے نساؤ کاؤنٹی کرکٹ اسٹیڈیم میں کھیلا گیا تھا، گروپ اے کے اس میچ میں بھارتی کپتان روہت شرما نے ٹاس جیت کر آئرلینڈ کو پہلے بیٹنگ کی دعوت دی۔

آئرلینڈ کی ٹیم بھارتی بولنگ کے سامنے ریت کی دیوار ثابت ہوئی اور پوری ٹیم 16 اوورز میں 96 رنز پر ڈھیر ہو گئی۔

آئرلینڈ کے گیرتھ ڈیلنی 26 رنز بنا کر نمایاں رہے، جبکہ جوشوا لٹل 14، کرٹس کمفر 12 اور ٹکر نے 10 رنز بنائے۔

بھارت کی جانب سے آئرلینڈ کی بیٹنگ لائن اپ میں دراڑ ڈالنے والے ہاردیک پانڈیا نے 3 کھلاڑیوں کو آؤٹ کیا، جبکہ بمرا اور ارشدیپ نے 2،2 وکٹیں حاصل کیں۔

بھارت نے آئرلینڈ کا 97 رنز کا ہدف باآسانی 12.2 اوورز میں 2 وکٹوں کے نقصان پر حاصل کیا۔

بھارت کے کپتان روہت شرما نے 52 رنز بنائے، جبکہ رشبھ پنت نے 36 رنز کی ناقابل شکست اننگ کھیلی۔

بھارت کے اسٹار بیٹسمین ویرات کوہلی صرف ایک رن بنا سکے جبکہ سوریا کمار یادیو 2 رنز بنا سکے۔

آئی سی سی مینز ٹی 20 ورلڈ کپ 2024 امریکہ اور ویسٹ انڈیز کی مشترکہ میزبانی میں کھیلا جا رہا ہے، جس میں 20 ٹیمیں مدمقابل ہیں، ایونٹ میں مجموعی طور پر 55 میچز کھیلے جائیں گے۔

پاکستان ایونٹ میں اپنا پہلا میچ کل میزبان ملک امریکہ کے خلاف کھیلے گا۔