چیف جسٹس پاکستان نے دورانِ سماعت کہا کہ جھوٹ بولنے پرڈالرملتے ہیں، یوٹیوب چینل پرلائیکس اور ہٹس ملتے ہیں، فیصل واوڈا الفاظ کا دفاع کرنا چاہتے ہیں تو ہم سننے کو تیار ہیں۔ 

رکن قومی اسمبلی مصطفیٰ کمال اورسینیٹر فیصل واوڈا کے خلاف توہین عدالت کیس کی سماعت کے دوران چیف جسٹس پاکستان جسٹس قاضی فائز عیسیٰ نے وکیل حافظ عرفان کو قرآن و حدیث کے حوالوں سے معاونت کرنے کی ہدایت کی۔

چیف جسٹس نے ریمارکس دیے کہ ہم اب ابھی کچھ بھی نہیں کر رہے، پہلے کنڈکٹ دیکھیں گے۔

مصطفیٰ کمال کے وکیل بیرسٹر فروغ نسیم نے کہا 16 مئی کے بعد سے میرے مؤکل نے اس گفتگو کے حق میں ایک لفظ نہیں بولا، جس پراٹارنی جنرل منصورعثمان اعوان نے کہا مصطفیٰ کمال کو اشارہ مل گیا ہے وہ پریس کانفرنس کریں گے۔

چیف جسٹس قاضی فائزعیسیٰ نے اٹارنی جنرل کو ٹوکتے ہوئے کہا آپ پراسیکیوٹر ہیں، ایسی بات نہ کریں۔ فیصل واوڈا پہلے دکھائیں کہ پریس کانفرنس میں کیا کہا تھا،  پھردیکھیں گے کہ توہین عدالت کا کیس بنتا ہے یا نہیں۔

وکیل معیزاحمد نے کہا کہ فیصل واووڈا نے پریس کانفرنس میں کہا تھا کہ عمومی بات کی ہے جس پر جسٹس عرفان سعادت نے کہا کہ  کہا گیا جسٹس اطہرمن اللہ اورجسٹس بابرستار کے حوالے سے پریس کانفرنس کر رہا ہوں،  فیصل واوڈا نے دو انتہائی معتبر ججز کے خلاف پریس کانفرنس کی اورالزامات لگائے۔

چیف جسٹس پاکستان نے کہا کہ فیصل واوڈا وکیل ہیں نہ بارکے عہدیدارتوعدلیہ پر کس حیثیت میں پریس کانفرنس کی؟ ہم نے کبھی کہا ہے کہ کس سینیٹرنے کبھی گفتگو کی یا نہیں کی کتنی مرتبہ حاضررہا،  اخبار میں آتا رہتا ہے کتنے سیبیٹرزغیرحاضر رہے کتنوں نے منہ ہی نہیں کھولا،  سروس میں کسی کو توسیع دیدی کہیں ووٹ دے دیا، ہم کہتے ہیں جب ہمارے پاس کیس آئے گا تو دیکھ لینگے۔

سپریم کورٹ نے توہین عدالت ازخود نوٹس کی سماعت 28 جون تک ملتوی کر دی۔