کراچی کے صنعتکاروں نے بجلی کی بندش میں ہونے والے نقصانات پر کے الیکٹرک کے خلاف عدالت جانے کا عندیہ دے دیا۔

کراچی چیمبر آف کامرس اور سائٹ ایسویسی ایشن بجلی کی بندش کے خلاف کے الیکٹرک پر پھٹ پڑے جب کہ انہوں نے بجلی کی بندش میں ہونے والے نقصانات پر کے الیکٹرک کے خلاف عدالت جانے کا عندیہ دے دیا ہے۔

کراچی چیمبر آف کامرس کی جانب سے جاری کردہ اعلامیہ میں کہا گیا ہے کہ کے الیکٹرک کی نااہلی کی وجہ سے سائٹ میں موجود بیشتر صنعتوں میں پیداواری سرگرمیاں مکمل طور پر بند ہیں۔

اعلامیہ کے مطابق دس روز سے بجلی کی مکمل بحالی نہ ہونے کی وجہ سے صنتعت کاروں کو بے پناہ نقصانات کا سامنا ہے، کے الیکٹرک کی وجہ سے ہونے والے نقصانات کے ازالے کے لئے سائٹ کے صنعتکار عدالت سے رجوع کرنے کا ارادہ رکھتے ہیں۔

اعلامیہ میں یہ بھی کہا گیا ہے کہ موجودہ مشکل حالات میں بجلی بحالی میں تاخیر سے صنعتوں کی پیداوار اور برآمدات پر منفی اثرات  پڑیں گے، اعلامیہ

صدر کراچی چیمبر نے کے الیکٹرک کی جانب سے صنعتوں کی بجلی تاحال مکمل طور پر بحال نہ کرنے پر تشویش کا اظہار کیا۔

اعلامیہ میں مزید کہا گیا ہے کہ ہارون آباد گرڈ اسٹیشن میں آگ لگنے کے واقعے کے دس روز گزرنے کے باوجود آج تک صنعتوں کی بجلی مکمل طور پر بحال نہیں کی جاسکی ہے، کے الیکٹرک فوری طور پر کام مکمل کرکے تمام صنعتوں کی بجلی بحال کرے۔