نائجیریا میں ایک تیز رفتار ٹرک بے قابو ہو کر سڑک کنارے نماز کی ادائیگی سے واپس آنے والے 14 نمازیوں کو کچل ڈالا۔

تفصلات کے مطابق نائجیریا کے شمالی شہر کانو میں ایک تیز رفتار ٹرک بے قابو ہو کر مسجد سے نماز کی ادائیگی کے بعد باہر نکلنے والے نمازیوں پر چڑھ دوڑا جس کے باعث 14 نمازی شہید ہو گئے، جبکہ متعدد زخمی ہو گئے۔

حکام کا کہنا ہے کہ ٹرک نے اپنا کنٹرول کھو دیا اور پیدل چلنے والوں سے ٹکرا گیا جو نماز جمعہ کے اختتام پر اپنے گھروں کو واپس جا رہے تھے۔

فیڈرل روڈ سیفٹی کمیشن نے جمعے کی رات ایک بیان میں کہا کہ مال سے لدے ٹرک نے کانو سے 30 کلومیٹر دور اماماوا گاؤں میں نماز جمعہ کی ادائیگی کے فورا بعد مسجد سے نکلنے والے نمازیوں کو کچل دیا۔

نائجیریا کی خراب سڑکوں پر حادثات عام ہیں جس کی بڑی وجہ تیز رفتاری اور ٹریفک قوانین کو نظر انداز کرنا ہے۔

روڈ سیفٹی کمیشن کے مطابق 2023 میں سڑک حادثات میں 5 ہزار سے زائد افراد ہلاک ہوئے جبکہ گزشتہ سال 6 ہزار 500 افراد ہلاک ہوئے تھے۔

تاہم عالمی ادارہ صحت نے گزشتہ سال اپنی ایک رپورٹ میں اندازہ لگایا تھا کہ نائجیریا میں سڑک حادثات سے ہونے والی سالانہ اموات 40 ہزار کے قریب ہیں جن میں سے زیادہ تر کی اطلاع حکام کو نہیں دی جاتی۔