صوبائی بجٹ میں سندھ پولیس کے ایس ایچ اوز کے لیے ساڑھے چار ارب روپے کا بجٹ ہوگا۔

تفصیلات کے مطابق آئی جی سندھ غلام نبی میمن کے مطالبے پر سندھ حکومت نے ایس ایچ اوز کے لیے ساڑھے چار ارب روپے کا بجٹ رکھنے کا فیصلہ کرلیا۔

آئی جی سندھ کا کہنا ہے کہ سندھ حکومت بھی چاہتی ہے کہ پولیس بجٹ ہونا چاہیے۔ سندھ کے 484 ایس ایچ اوز کو خودمختار کرنے جارہے ہیں۔

غلام نبی میمن کا کہنا ہے کہ سینئر افسران کے پاس پولیس اسٹیشنز کے لیے لم سم بجٹ جاتا تھا۔ ہم چاہ رہے ہیں کہ یہ بجٹ براہ راست پولیس اسٹیشنز میں جائے، ایس ایچ او کا اختیار ہوگا کہ وہ بجٹ کو استعمال کرسکے گا۔

انہوں نے کہا کہ  موبائل کا پیٹرول، گاڑیوں کی مرمت اور دیگر اخراجات ہوتے ہیں۔ تھانے کو چلانا اور تفتیش کے لیے پیسوں کی ضرورت ہوتی ہے، تھانوں کو جب پیسہ نہیں ملتا تو مسئلہ بدعنوانی تک جاتا ہے۔ اس حل کے بعد ہم سمجھتے ہیں تھوڑی بہتری آئے گی۔

آئی جی سندھ نے مزید کہا کہ بجٹ میں پولیس ویلفیئر کے لیے 5 ارب روپے کا پیکج رکھا جارہا ہے۔ چاہ رہے تھے کہ سندھ پولیس کو میڈیکل کی سہولیات ملیں، پہلے میڈیکل کی سہولت نہیں تھی، علاج کروا کر بل جمع کروانا پڑتا تھا، زیادہ تر کو پیسے نہیں ملتے تھے نا ہی اتنے پیسے ہوتے تھے۔

غلام نبی میمن نے کہا کہ اب سندھ پولیس کا ہر ملازم سالانہ 10 لاکھ کا میڈیکل کروا سکے گا۔ ملازم کے بیوی بچے  اور ماں باپ کسی بھی اسپتال میں علاج کروا سکیں گے۔

انہوں نے کہا کہ ای ٹیگنگ کے لیے کافی کام کیا، ہمارا منصوبہ مکمل ہوگیا ہے۔