کوئٹہ: بلوچستان کے آئندہ مالی سال کا بجٹ 800 ارب روپے سے زائد رہنے کا امکان۔

ذرائع محکمہ خزانہ کے مطابق بلوچستان کے آئندہ مالی سال کا بجٹ 21 جون کو پیش کیا جائے گا جو 800 ارب روپے سے زائد کا ہوگا۔

ذرائع محکمہ خزانہ کا کہنا ہے کہ این ایف سی ایوارڈ کے تحت رواں مالی سال کے مقابلے میں بلوچستان کو وفاق سے آئندہ مالی سال کے لیے 15 ارب 32 کروڑ روپے زیادہ ملیں گے۔

ذرائع نے بتایا کہ بلوچستان کو آئندہ مالی سال کے لیے این ایف سی ایوارڈ کے تحت وفاقی حکومت سے 667 ارب 55 کروڑ روپے ملیں گے جب کہ قابل تقسیم محاصل سے بلوچستان کی آمدنی کا تخمینہ 647 ارب 70 کروڑ روپے ہے۔

ذرائع محکمہ خزانہ کا کہنا ہے کہ گیس اور تیل پر رائیلٹیز سے براہ راست منتقلیوں کی مد میں بلوچستان کو 20 ارب 55 کروڑ روپے ملیں گے۔

محکمہ خزانہ کا کہنا تھا کہ رواں مالی سال میں وفاق سے این ایف سی ایوارڈ کے تحت بلوچستان کو 493 ارب 70 کروڑ روپے سے زائد ملے، رواں مالی سال میں قابل تقسیم محاصل سے بلوچستان کو 475 ارب 39 کروڑروپے کی آمدنی ہوئی۔

ذرائع نے کہا کہ براہ راست منتقلیوں کی مد میں وفاق سے 18 ارب 31 کروڑ روپے ملے جب کہ براہ راست منتقلیوں میں گیس رائیلٹی کی مد میں 16 ارب 51 کروڑ روپے، گیس  پر ایکسائز ڈیوٹی کی مد میں 2 ارب 51 کروڑ روپے ملے۔

ذرائع محکمہ خزانہ نے مزید بتایا کہ براہ راست منتقلیوں کی مد میں بلوچستان کو پروجیکٹڈ فگر کے مقابلے میں 80 کروڑ 78 لاکھ روپے کم ملے۔