لاہور: پنجاب حکومت نے عید کے دنوں میں دریاؤں اور جھیلوں میں نہانے جب کہ کشتی رانی کی سیر پر بھی پابندی عائد کردی۔

محکمہ داخلہ پنجاب نے عید الاضحیٰ کے موقع پر اہم احکامات جاری کردیے ہیں جس کے مطابق کسی بھی کالعدم تنظیم کو قربانی کی کھالیں اکٹھی کرنے کی اجازت نہیں ہوگی، صرف چیریٹی کمیشن کے ساتھ رجسٹرڈ ادارے ہی قربانی کی کھالیں وصول کرسکیں گے۔

محکمہ داخلہ پنجاب کا کہنا ہے کہ عوامی مقامات پر سری پائے جلانے پر دفعہ 144 لاگو ہوگی، عید کی چھٹیوں میں دریاؤں، ندی نالوں اور ڈیمز میں نہانے اور کشتی رانی کی اجازت نہیں ہوگی۔

محکمہ داخلہ پنجاب کے مطابق جانوروں کے فضلے اور اوجھڑی کو مین ہول یا کینال میں پھیکنے پر بھی دفعہ 144 نافذ ہوگی جب کہ انسانی جانوں کی حفاظت کیلئے عارضی نصب ہونے والے مکینیکل جھولوں پر پابندی عائد ہوگی.

محکمہ داخلہ پنجاب نے کہا کہ صوبے بھر کی عید گاہوں، مساجد اور مدارس میں اضافی سیکیورٹی کے انتظامات کی ہدایت کی گئی ہے، تمام مویشی منڈیوں میں بھی بہترین سیکیورٹی انتظامات یقینی بنائے جائیں گے۔

محکمہ داخلہ پنجاب نے ہدایت کی کہ انتظامیہ یقینی بنائے کہ مویشی منڈیوں میں کسی قسم کا کمیشن یا بھتہ وصول نہ کیا جائے، پنجاب بھر میں کوئی غیر قانونی مویشی منڈی قائم نہ ہونے دی جائے۔

محکمہ داخلہ پنجاب نے مزید یہ بھی ہدایت کی کہ مری اور گلیات میں سیاحوں کی آمد اور ٹریفک کنٹرول کیلئے ضروری حفاظتی اقدامات یقینی بنائے جائیں جب کہ عید سے قبل تمام انتظامات یقینی بنانے کیلئے کمشنرز اور ڈپٹی کمشنرز پولیس اور متعلقہ محکموں کے ساتھ بیٹھیں۔