مکہ مکرمہ کی پولیس نے سوشل میڈیا کے ذریعے جعلی حج مہم کو فروغ دینے کے الزام میں دو مصری باشندوں کو گرفتار کرلیا ہے۔

اس مہم میں حجاج کرام کے لیے رہائش، نقل و حمل اور قربانی کا جھوٹا وعدہ کیا گیا تھا۔

 سعودی عرب کے ڈائریکٹوریٹ آف پبلک سکیورٹی نے شہریوں اور رہائشیوں کو خبردار کیا ہے کہ وہ محتاط رہیں اور مشکوک آن لائن اشتہارات کا جواب دینے سے گریز کریں۔

ایس پی اے کے مطابق حکام نے ان افراد کو گرفتار کیا، قانونی کارروائی کی اور انہیں پبلک پراسیکیوشن کے حوالے کردیا۔

ان اشتہارات میں دوسروں کی جانب سے حج کی ادائیگی، قربانیوں کو محفوظ اور تقسیم کرنے، حج بریسلیٹ فروخت کرنے یا نقل و حمل کی فراہمی جیسی خدمات پیش کی جا سکتی ہیں۔

ایس پی اے نے کہا کہ اس آن لائن فراڈ میں اکثر فرضی ادارے اور افراد شامل ہوتے ہیں جن کا واحد مقصد ممکنہ زائرین کو دھوکہ دینا ہوتا ہے۔

حکام نے متنبہ کیا ہے کہ ایسی دھوکہ دہی کی سرگرمیوں میں ملوث افراد کو قانون کے تحت سزا دی جائے گی۔

محفوظ اور جائز حج تجربے کو یقینی بنانے کے لئے ڈائریکٹوریٹ آف پبلک سکیورٹی نے شہریوں، رہائشیوں اور حج زائرین کو خبردار کیا ہے کہ وہ سرکاری حج قواعد و ضوابط اور ہدایات پر عمل کریں۔

سعودی ڈائریکٹوریٹ آف پبلک سکیورٹی نے مکہ، ریاض اور مشرقی صوبے کے رہائشیوں کو کسی بھی مشتبہ خلاف ورزیوں کی اطلاع کے لیے 911 کا نمبر مہیا کیا ہے جبکہ دیگر تمام علاقوں کے لیے 999 ہیلپ لائن نمبر دیا ہے۔