ذرائع کا کہنا ہے کہ وزیراعظم شہبازشریف 2 جولائی کو وسطی ایشیائی ممالک کے دورہ پر روانہ ہونگے،  وزیراعظم کا دو ملکی دورہ 3 روزہ ہوگا۔ 

ذرائع نے بتایا کہ وزیراعطم کے ہمراہ ایک وفد بھی وسطی ایشیائی ممالک پہنچے گا، وزیراعظم دورہ سنٹرل ایشیا کے پہلے حصے میں دو جولائی کو تاجکستان پہنچیں گے۔ وزیراعظم شہباز شریف دورہ تاجکستان تاجک صدر امام علی رحمانوو کی دعوت پر کررہے ہیں،  دورے میں وزیراعظم شہبازشریف کی سراج الدین مہرالدین سے بھی ملاقات ہوگی۔

ذرائع کے مطابق وہ دوشنبے میں تاجک صدر امام علی رحمانوف سے بھی ملاقات کریں گے. ملاقاتوں میں افغانستان کی صورتحال,، باہمی منسلکی اور تجارت و سرمایہ کاری کے فروغ پر تبادلہ خیال ہو گا، تاجک رہنماوں سے ملاقاتوں میں باہمی دلچسپی کے عالمی و علاقائی امور پر تبادلہ خیال ہوگا۔

ذرائع نے بتایا کہ پاکستان اور تاجکستان دونوں ممالک کو افغانستان کی صورتحال پر شدید تحفظات ہیں، افغانستان میں دہشت گرد گروہوں کی موجودگی اور افغان سرزمین کا دہشت گردی کےلیے استعمال دونوں ممالک کے لیے درد سر ہے۔ وزیراعظم شہبازشریف دورہ وسطی ایشیاء کے دوسرے حصے میں قازقستان جائنگے، وزیراعظم کا دورہ قازقستان 2 روزہ ہوگا۔

ذرائع کا کہنا ہے کہ وزیراعظم دورہ قازقستان میں 3 اور 4 جولائی کو آستانہ میں ہونے والی شنگھائی تعاون تنظیم کے سربراہ اجلاس میں شریک ہوں گے، اجلاس میں چینی صدر شی جن پنگ, روسی صدر ولادی میر پیوٹن سمیت متعدد عالمی راہنما شرکت کریں گے،  بھارتی وزیراعظم نریندر مودی کی ایس سی او سربراہ اجلاس میں شرکت مشکوک ہے، ایس سی او سربراہ اجلاس کی سائیڈ لائنز پر وزیراعظم شہباز شریف کی روسی و چینی صدور سمیت متعدد عالمی رہنماوں سے ملاقاتیں متوقع ہیں۔

وہ آستانہ میں دیگر ممالک کی قیادت سے بھی ملاقاتیں کریں گے، دورہ قاقستان میں شہباز شریف قازق صدر قاسم جمارت توکائیو اور وزیر خارجہ مرات نورتلیو سے بھی ملاقات کریں گے۔