کوہاٹ : ہنگو روڈ پر پرچاؤ بانڈہ کے قریب مسافر کوچ پر فائرنگ سے 2 افراد جاں بحق جب کہ متعدد زخمی ہوگئے۔

کوہاٹ میں ہنگو روڈ پر پرچاؤ بانڈہ کے قریب مسافر کوچ پر فائرنگ کی گئی ہے جس کے نتیجے میں مسافر کوچ کے ڈرائیور سمیت 2 افراد جاں بحق اور متعدد مسافر زخمی ہوگئے ہیں۔

ریسکیو 1122 کے مطابق جاں بحق ڈرائیور کی لاش اور زخمیوں کو اسپتال منتقل کردیا گیا ہے، فائرنگ کے نتیجے میں 5 افراد شدید زخمی ہیں۔

ترجمان ریسکیو 1122 کا کہنا ہے کہ ایمرجسنی کی اطلاع ریسکیو کنٹرول روم کو موصول ہوتے ہی ریسکیو 1122 کی میڈیکل ٹیموں نے بروقت رسپانس کیا۔

ترجمان نے بتایا کہ زخمیوں کو ابتدائی طبی امداد فراہم کرنے کے ساتھ ساتھ انتہائی تشویشناک حالت میں انہیں ڈی ایچ کیو اسپتال کوہاٹ کے ڈی اے منتقل کردیا گیا، جہاں ڈاکٹروں نے دو افراد کے فوت ہونے کی تصدیق کی۔

ترجمان نے مزید بتایا کہ حادثے میں واجد حسین اور نوردل خان جاں بحق ہوئے جب کہ زخمیوں کی شناخت سمیع اللہ، امجد اور زوہیب کے نام سے ہوئی ہے۔

دوسری جانب پولیس کا کہنا ہے کہ واقعے کی اطلاع پر پولیس کی بھاری نفری فی الفور جائے وقوعہ پر پہنچ گئی ہے۔

پولیس کے مطابق واقعے میں ملوث ملزمان کی تلاش کے لئے علاقے میں سرچ آپریشن جاری ہے، واقعہ ذاتی عداوت کا شاخسانہ بتایا جارہا ہے۔