اسرائیل نے فضائی حملہ کرکے حماس رہنما اسماعیل ہانیہ کے 10 فیملی ممبران کو شہید کردیا۔

عرب میڈیا کے مطابق اسرائیل کی جانب سے جنوبی غزہ میں شاتی پناہ گزین کیمپ پر حملہ کیا گیا جس کے نتیجے میں حماس رہنما اسماعیل ہانیہ کے 10 فیملی ممبران شہید ہوگئے۔

رپورٹ کے مطابق حماس رہنما کی فیملی کی جانب سے حملے اور شہید ہونے والے افراد کی تصدیق کردی گئی ہے جن میں اسماعیل ہانیہ کی بہن زہر ہانیہ بھی شامل ہیں۔

حماس نے اس حملے کا الزام امریکہ پر عائد کرتے ہوئے کہا ’’بائیڈن انتظامیہ ہی اس حملے کی اور غزہ میں فلسطینیوں کے خلاف ہونے والی تباہی کی ذمہ دار ہے‘‘۔

انہوں نے کہا ’’امریکہ ہی اسرائیل کی سیاسی اور فوجی حمایت کررہا ہے جب کہ ممکنہ طور پر اب بھی کئی لاشیں ملبے کے نیچے دبی ہوئی ہیں جنہیں نکالنے کے لیے ہمارے پاس ضروری سامان موجود نہیں‘‘۔

انہوں نے بتایا ’’شہری دفاع کے عملے نے لاشوں کو غزہ شہر کے قریب اسپتال الاہلی منتقل کردیا ہے جب کہ کئی دیگر افراد بھی زخمی ہونے کی اطلاعات ہیں‘‘۔

اپنے بیان میں حماس نے بین الاقوامی برادری اور اقوام متحدہ سے اپنی ذمہ داری ادا کرنے کا مطالبہ کرتے ہوئے بے گناہ شہریوں کو تحفظ دینے کی اپیل کی ہے جب کہ اس جرم کے مرتکب افراد کے خلاف بھی سخت کارروائی کا مطالبہ کیا گیا ہے۔

دوسری جانب اسرائیلی فوج نے اپنے بیان میں بتایا کہ رات کے وقت شاتی اور درج توفح میں دو عمارتوں کو نشانہ بنایا گیا تھا جب کہ اس حملے میں 7 اکتوبر کو اسرائیل کے خلاف ہونے والے حملے میں ملوث افراد کو نشانہ بنایا گیا ہے۔

واضح رہے کہ اس سے قبل اسرائیلی فوج نے فضائی حملہ کرکے اسماعیل ہانیہ کے 3 بیٹے اور 3 پوتوں کو شہید کردیا تھا۔