پاکستان کا اقوام متحدہ میں سیکیورٹی کونسل کی اہم نشست پر بلا مقابلہ منتخب ہونے کا قوی امکان ہے۔

اقوام متحدہ میں چھ جون کو سیکیورٹی کونسل میں پانچ منتخب اراکین کا انتخابی مرحلہ ہے جب کہ سفیر پاکستان منیر اکرم کی کامیاب سفارت کاری کے باعث پاکستان کا اس اہم سیٹ پر بلا مقابلہ منتخب ہونے کا قوی امکان ہے۔

ایشیا پیسیفک ممالک کی مخصوص نشست کے لئے پاکستان کو تمام 53 ممالک کی حمایت حاصل ہے، او آئی سی اور دیگر ممالک بھی پاکستان کی مکمل حمایت کررہے ہیں۔

پاکستان کی کامیابی میں سفیر منیر اکرم کی گزشتہ چند ماہ کی انتھک محنت شامل ہے، سفیر منیر اکرم کی کامیاب سفارت کاری میں بھارت پاکستان کی رسمی مخالفت بھی نہیں کرسکا ہے۔

سیکیورٹی کونسل کی نشست جیتنے کے لئے جنرل اسمبلی میں دو تہائی اکثریت کی ضرورت ہوتی ہے، 193 ممالک کی اسمبلی میں منتخب ہونے کے لئے 128 ووٹ درکار ہوتے ہیں۔

تاہم چھ جون کو یہ دیکھنا ہے کہ پاکستان کتنے ووٹ حاصل کرتا ہے جب کہ سیکیورٹی کونسل کی اہم نشست کی مدت دو سال کے لئے ہوتی ہے۔

پاکستان اپنی ذمہ داریاں یکم جنوری 2025 سے شروع کرے گا، پاکستان سے پہلے ایشیا پیسیفک ممالک کی یہ مخصوص نشست جاپان کے پاس تھی۔

سیکیورٹی کونسل اقوام متحدہ کا اہم ترین فورم اور دنیا میں امن اور سیکیورٹی کے حوالے سے فیصلہ سازی میں کردار ادا کرتا ہے، پاکستان اس سے پہلے سات بار سیکیورٹی کونسل کا ممبر رہ چکا ہے۔