وزیراعلٰی بلوچستان میرسرفراز بگٹی نے گھوسٹ اوردوہری ملازمت کے حامل ملازمین کیخلاف کارروائی کا حکم دے دیا۔

کوئٹہ میں وزیراعلیٰ بلوچستان سرفرازبگٹی کی زیرصدارت اجلاس میں ترقیاتی بجٹ پرعملدرآمدکاجائزہ لیا گیا۔ اجلاس میں پی ڈی ایم اے کی جانب سے مون سون سیزن کےانتظامات سے متعلق بھی جائزہ لیا گیا۔

وزیراعلٰی بلوچستان سرفراز بگٹی نے کہا کہ بلوچستان حکومت کی کارکردگی کاامتحان نئےمالی سال کےآغازسےہوا، یکم جولائی کو ترقیاتی منصوبوں کے ٹینڈرشروع کردیے گئے۔

سرفراز بگٹی نے کہا کہ ترقیاتی منصوبوں کاجائزہ لینے کیلئے ہفتے میں 2 دن دورے کروں گا، وزرا اورسیکریٹریزبھی وزٹ کرکے منصوبوں کاجائزہ لیتے رہیں، فزیکل پراگرس کے برعکس فنڈزکا اجرا سنگین جرم ہے، کارروائی ہوگی۔ فنڈزکااجراکام کی رفتار سے مشروط ہے۔

وزیراعلیٰ بلوچستان نے سیکریٹریزکوہدایت کی کہ کوئی سیاسی پریشرنہ لیاجائے، محکمہ پی اینڈ ڈی، محکمہ فنانس کوبااختیاراورجوابدہ بنائیں گے۔

اجلاس میں انکشاف کیا گیا کہ اسسٹنٹ ڈائریکٹرانوائرمنٹل پروٹیکشن ایجنسی کے ماتحت 22 نائب قاصد ہیں۔

سرفراز بگٹی نے کہا کہ ماضی میں غیرضروری بھرتیاں کی گئیں، ملازمین کی اکثریت ڈیوٹی دینےکے لئےتیارنہیں، سب گھر بیٹھے تنخواہوں کے طلب گار ہیں، آرایچ سی کا دورہ کیا، ڈاکٹرزسے لیکرچوکیدارتک سب غیرحاضرتھے۔

انھوں نے مزید کہا کہ آرایچ سی کے دفاتربند، تالے زنگ آلود ہوچکے، عادی غیرحاضرملازمین کی برطرفی میں رولزحائل ہیں، بھرتی آسان برطرفی مشکل، صوبے میں کوئی ڈیوٹی کرنے کوتیارنہیں، سروس رولزکوبہتربناکرجزاوسزاکاعمل ضروری ہے۔

وزیراعلیٰ بلوچستان نے محکمہ سروسزاینڈ جنرل ایڈمنسٹریشن کوجامع قوانین وضوابط بنانےکاحکم دیتے ہوئے کہا کہ انکوائریزکی موٹی فائلزغیرقانونی امورمیں ملوث عناصرکاکچھ نہیں بگاڑپاتیں، جزاوسزاکے لئے فوری کارروائی اورکام چوروں کی برطرفی ضروری ہے۔

میرسرفراز بگٹی نے گھوسٹ اوردوہری ملازمت کے حامل ملازمین کےخلاف کارروائی کاحکم دیتے ہوئے کہا کہ سرکاری نوکری کی جائیداد کی طرح نسل درنسل منتقلی کوروکناہوگا، مچھلی منڈی بنا کرصوبے کو نہیں چلایا جاسکتا۔