چین کی پیپلزلبریشن آرمی کے قیام کی 97 ویں سالگرہ کے موقع پرآرمی چیف جنرل عاصم منیرنے کہا ہے کہ پاکستان اور چین کے دو طرفہ تعلقات مثالی ہیں۔ 

پاک فوج کے شعبہ برائے تعلقاتِ عامہ آئی ایس پی آرکے مطابق جی ایچ کیو میں چین کی پیپلز لبریشن آرمی کے قیام کی 97 ویں سالگرہ کی تقریب کا اہتمام کیا گیا۔

آئی ایس پی آر کی جانب سے جاری بیان میں کہا گیا کہ چین کےسفیرجیانگ زائڈونگ تقریب کے مہمان خصوصی تھے، چینی ڈیفنس اتاشی سفارتخانے کے حکام، تینوں مسلح افواج کےافسران نے بھی شرکت کی۔

آئی ایس پی آر کے مطابق آرمی چیف جنرل عاصم منیرنے چینی مہمانوں کا خیرمقدم کرتے ہوئے پی ایل اے کو مبارکباد پیش کی۔ آرمی چیف نے چین کے دفاع، سلامتی، ترقی میں پیپلزلبریشن آرمی کے کردارکوسراہا۔

اس موقع پر آرمی  چیف جنرل عاصم منیر نے خطاب میں کہا کہ پاکستان اورچین کے دوطرفہ تعلقات مثالی ہیں، اسٹریٹجک صورتحال میں پاکستان اورچین کے تعلقات قائم ودائم رہے، پاک فوج اورپیپلزلبریشن آرمی کے تعلقات مضبوط ہیں۔ دوطرفہ عسکری تعاون دونوں ممالک کے برادرانہ تعلقات کا مظہرہے۔

آئی ایس پی آرکے مطابق چینی سفیر نے تقریب سے خطاب میں کہا کہ پاک فوج ہمیشہ دہشت گردی کے خلاف جنگ میں پیش پیش رہی، پاک فوج نے پاکستان اورخطے میں امن اوراستحکام کیلئے قربانیاں دیں۔

چین کے سفیرجیانگ زائڈونگ نے اپنے خطاب میں مزید کہا کہ انسداد دہشت گردی کیلئے اپنے بھائیوں کے ساتھ کام کرنے کو تیار ہیں، کوئی طاقت پاکستان اورچین کے تعلقات کوتباہ نہیں کرسکتی۔