تل ابیب: ہزاروں افراد کے نیتن یاہو کے خلاف احتجاج کے بعد اسرائیلی وزیر اعظم پر مزید دباؤ بڑھ گیا ہے۔

غیر ملکی خبر رساں ادارے کے مطابق اسرائیل میں نیتن یاہو حکومت کے خلاف ہزاروں افراد نے سڑکوں پر نکل کر احتجاجی مظاہرہ کیا۔

مظاہرین نے تل ابیب کی سڑکوں پر اسرائیلی حکومت کے خلاف نعرے لگائے اور جنگ بندی کا مطالبہ کیا۔

مظایرین میں خواتین اور بچے بھی شامل تھے، جنہوں نے غزہ میں جنگ ختم کرنے کے بینرز اٹھائے ہوئے تھے۔

مظاہرین نے سڑکوں پر کئی مقامات پر آگ لگا دی اور نیتن یاہو حکومت کے خلاف نعرے بازی کی جب کہ مظاہرین نے اسرائیلی وزیراعظم کو یرغمالیوں کی رہائی میں ناکامی کا ذمہ دار قرار دیا۔

خیال رہے کہ غزہ میں اسرائیلی جنگ کو 269 روز مکمل ہوگئے تاہم بمباری کا سلسلہ تاحال جاری ہے۔

گزشتہ 24 گھنٹوں میں 45 فلسطینی شہید ہوئے، غزہ شہر کے علاقے شجاعیہ میں اسرائیلی فورسز نے محاصرہ کرلیا۔

ٹینکوں کی پیش قدمی کے باعث فلسطینی شہری پھنس کر رہ گئے ہیں جب کہ اسرائیل کی رفح اور خان یونس پر حملوں میں ہلاکتوں کا خدشہ ہے۔

دوسری جانب فلسطینی مزاحمت کاروں کی اسرائیلی فوج سے شدید جھڑپیں جاری ہیں، جولان کی پہاڑیوں پر ڈرون حملے میں 18 اسرائیلی فوجی زخمی ہوگئے جس کی تصدیق اسرائیلی فوج کی جانب سے کی گئی ہے۔

واضح رہے کہ غزہ میں جاری جنگ کے دوران شہادتوں کی مجموعی تعداد 37 ہزار 877 ہوگئی ہے جب کہ 86 ہزار 969 فلسطینی زخمی ہیں۔