لاہور: اسپیکر پنجاب اسمبلی ملک احمد خان کا کہنا ہے کہ گالی اور نفرت کی سیاست کسی کے حق میں نہیں ہے۔

اسپیکر پنجاب اسمبلی ملک احمد خان نے نیوز کانفرنس کرتے ہوئے کہا کہ ہمارے ایک کارکن سے بدتمیزی کی گئی اور تاثر دیا جارہا ہے کہ بطور اسپیکر کسی جماعت کا پلڑا بھاری کردیا۔

انہوں نے کہا کہ گالی اور نفرت کی سیاست کسی کے حق میں نہیں، گالی اور الزامات اس نہج پر پہنچ جائیں تو اثر معاشرے پر آئے گا۔ ہمارے ایک کارکن پر پی ٹی آئی کے لوگوں نے تشدد کیا، ریکارڈنگ نکالی تو دیکھا کہ یہ پی ٹی آئی کے لوگ ہیں۔

ملک احمد خان  کا کہنا تھا کہ اس قسم کے رویے کی ایوان میں اجازت نہیں دے سکتے، کل ہماری ایک معزز ممبر کی جعلی نازیبا ویڈیو سامنے آئی۔ کسی رکن کو جعلی حاضری پر تنخواہ یا مراعات نہیں لینے دوں گا جب کہ کسی ایک جماعت پرتنقید میرا مقصد نہیں۔

اسپیکر پنجاب اسمبلی کہتے ہیں کہ گالم گلوچ کرنے والوں کی اسمبلی رکنیت معطل کرسکتا ہوں، خواتین کے خلاف غلیظ زبان کا استعمال شرمناک ہے، ایک جماعت ملک کوعدم استحکام کا شکار نہ کرے۔

ان کا مزید کہنا تھا کہ انتشار اور نفرت کی سیاست کو دفن کرنا ہوگا، اسمبلی کارروائی کا 70 فیصد وقت اپوزیشن کو دیا جب کہ 2014 میں پی ٹی آئی نے دھاندلی کا مقدمہ کیا تھا، ڈیجیٹل دہشت گردی نے پورے ملک میں پنجے گاڑ لیے ہیں۔