پی ٹی آئی رہنماؤں کا کہنا ہے کہ حکومت کے آج کے اعلان سے واضح ہے کہ پی ڈی ایم حکومت بلے کا نشان لینے کی سازش میں شامل تھی۔ 

اسلام آباد میں پاکستان تحریک انصاف کے دیگر رہنماؤں کے ہمراہ پریس کانفرنس کرتے ہوئے سینیٹ میں اپوزیشن لیڈر شبلی فراز نے کہا کہ وفاقی وزیر کا اعلان سن کر محاورہ سمجھ میں آیا ’چھوٹا منہ بڑی بات‘، پی ٹی آئی پارلیمنٹ میں سب سے بڑی پارلیمانی جماعت ہے، اس جماعت کے تمام فیڈریشن یونٹس میں نمائندگی ہے۔

انہوں نے کہا کہ 70 سال ہوگئے لوگوں کو بھیڑ بکریاں کی طرح رکھا گیا، ن لیگ کا ٹریک ریکارڈ صرف کرپشن اور ملک دشمنی رہا، یہ جج بھی خود بننا چاہتے ہیں اور جیوری بھی خود بننا چاہتے ہیں، یہ سپریم کورٹ کے صرف ان فیصلوں کو مانتے ہیں جو ان کی مرضی کے ہوں۔

شبلی فراز کا کہنا تھا کہ انہوں نے پی ٹی آئی کو ختم کرنے کے تمام حربے استعمال کرلیے، اب الیکشن ٹریبونلز کو مینج کرنے کی کوشش کی جا رہی ہے، جو حرکات انہوں نے کی وہ کوئی سیاسی جماعت نہیں کر سکتی، اس جماعت کو عوام کی پذیرائی کسی صورت حاصل نہیں۔

عمر ایوب خان

قومی اسمبلی میں اپوزیشن لیڈر اور پی ٹی آئی کے سیکریٹری جنرل عمر ایوب نے کہا کہ فارم 47 کی حکومت نے اوورسیز پاکستانیوں سے ووٹ کا حق بھی چھینا، ان لوگوں کی جانب سے ای وی ایم مشین کو ختم کیا گیا، اس حکومت کے آئی ایس آئی کو حق دیا کہ لوگوں کے فون ٹیپ کریں۔

انہوں نے کہا کہ بجٹ بک کے اندر نجکاری ایس آئی ایف سی کے ذریعے کرنے کی کوشش کی بات کی گئی، جو کمپنیز یہ نجکاری میں لیکر جائیں گے ان کی مالیت بس ایک ہزار ارب ہے۔

عمر ایوب کا کہنا تھا کہ پاکستان پیپلزپارٹی نے نیشنل عوامی پارٹی پر پابندی لگائی، ہم چاہتے ہیں کہ یہ تمام جماعتیں جمہوریت کے ساتھ کھڑی ہوں، اس وقت اگر کوئی پارٹی قومی سلامتی کے لیے خطرہ ہے وہ تو ن لیگ ہے۔

انہوں نے کہا کہ عمران خان اور بشری بی بی کے خلاف تمام کیسز ختم ہوچکے، سپریم کورٹ نے پی ٹی آئی کو سیاسی جماعت ڈکلئیر کیا ہے، تارڑ نے جو پریس کانفرنس کی وہ ان کی خواہشات ہوسکتی ہیں، مری میں ن لیگ کے بڑوں کی نشست کی کھچڑی سامنے آئی۔

اپوزیشن لیڈر کا کہنا تھا کہ ہم مطالبہ کرتے ہیں پی پی پی، اے این پی اور باقی جماعتیں صاف صاف میدان میں آئیں، تمام جماعتیں واضع کریں کہ وہ جمہوریت کے ساتھ ہیں یا سول مارشل لاء کے ساتھ کھڑی ہیں۔

انہوں نے کہا کہ مہنگائی ابھی عروج پر جائے گی، ہمارے دور میں 17 روپے کا یونٹ تھا آج 85 روپے فی یونٹ ہے، پٹرولیم مصنوعات، آٹا، گھی سب کی قیمت آسمان پر جائے گی، ان سب سے عوام کا دھیان ہٹانے کے لیے یہ کھچڑی پکائی گئی۔

بیرسٹر گوہر

چیئرمین پی ٹی آئی بیرسٹر گوہر کا کہنا تھا کہ آج حکومت کی طرف سے ایک اعلان ہوا، ہم اس اعلان کی ہر بات کو سنجیدہ لیتے ہیں، آئین و قانون کے ساتھ بہت مذاق ہوچکا، اعلان میں کہا گیا کہ پی ٹی آئی پر پابندی لگانے کی کوشش کی جائے گی، یہ اعلان سپریم کورٹ کے فیصلے کی کھلی خلاف ورزی ہے۔

انہوں نے کہا کہ سپریم کورٹ نے واضع کہا کہ مخصوص نشستیں پی ٹی آئی کا حق ہیں، اعلان سے واضع ہوا کہ پی ڈی ایم بلے لینے کی سازش کا حصہ تھی۔