وفاقی وزیر سرمایہ کاری بورڈ عبدالعلیم خان کا کہنا ہے کہ چینی کمپنیوں کے اشتراک سے تجارت میں ایک ارب ڈالر کا اضافہ ہو سکتا ہے۔

وفاقی دارالحکومت  اسلام آباد  میں وفاقی وزراء عبدالعلیم خان اور جام کمال خان کا پاک چین تجارتی امور پر اعلیٰ سطحی بریفنگ اجلاس ہوا۔

اجلاس میں چین اور پاکستان کی کمپنیوں کے مابین’جوائنٹ وینچرز‘ کے لیے حکمت عملی کو حتمی شکل دے دی گئی۔

وفاقی وزیر سرمایہ کاری بورڈ  نے بریفنگ میں کہا کہ  پاکستان 7 بڑے  شعبوں میں سرمایہ کاری کے لئے چینی کمپنیوں کو مدعو کرے گا۔ چین سے 78 اور پاکستان سے 167 کاروباری ادارے شریک ہوں گے۔

انہوں نے کہا کہ  ان میں طبی، آلات، پلاسٹک، کلوتھنگ، لیدر، گوشت، فروٹ و سبزیاں اور ویسٹ و چارہ  کے کاروباری افراد شامل ہوں گے۔

عبدالعلیم خان کا کہنا تھا کہ  بنگلہ دیش، انڈیا، ویت نام کے مقابلے میں پاکستان میں سرمایہ کاری زیادہ پرکشش ہے۔

 وفاقی وزیر عبدالعلیم خان  نے بورڈ آف انویسٹمنٹ کو وزیر اعظم کے لئے تفصیلات تیار و پیش کرنے کی ہدایت کرتے ہوئے کہا کہ  خارجہ، تجارت، صنعت و پیداوار، فوڈ سیکیورٹی اور میری ٹائم کی وزارتوں کو آن بورڈ لیں۔

انہوں نے کہا کہ  پاکستان چین سے مختلف شعبوں میں دو طرفہ تجارت کے نئے دروازے کھولنا چاہتا ہے۔  چین کی کمپنیوں کے اشتراک سے تجارت میں ایک ارب ڈالر کا اضافہ ہو سکتا ہے۔

عبدالعلیم خان   نے کہا کہ نئی صنعتیں وہاں لگائیں جہاں بجلی کی زیادہ سے زیادہ فراہمی ممکن ہو سکے۔

وفاقی وزیر عبدالعلیم خان  نے بورڈ آف انویسٹمنٹ کے حکام کو سرمایہ کاری کمپنیوں سے فوری بات چیت کرنے کی ہدایت کی اور کہا کہ چینی کمپنیوں کے لئے بیجنگ میں پاکستانی سفارتخانے کو بھی آن بورڈ لیا جائے۔

وفاقی وزیر تجارت جام کمال خان کی بھی چینی کمپنیوں اور تجارتی امور کے حوالے سے  تفصیلی بات چیت ہوئی۔

وفاقی وزیر جام کمال  نے وزارت تجارت کو بورڈ آف انوسٹمنٹ سے مکمل تعاون اور مشترکہ کاوشوں کی ہدایت کی۔