لاہور: وزیراعلیٰ پنجاب مریم نواز کا یوم عاشور کے موقع پر کہنا ہے کہ واقعہ کربلا اسلامی تاریخ کا گراں قدر اور تاریخ ساز باب ہے۔

وزیراعلیٰ پنجاب مریم نواز شریف نے یوم عاشور پر جاری پیغام میں کہا کہ نواسہ رسول، جگر گوشہ بتول، حضرت امام حسینؓ اور ان کے جانثاروں کو سلام، اہل بیت سے محبت و تکریم ہر مسلمان کے ایمان کا حصہ ہے۔

مریم نواز نے کہا کہ واقعہ کربلا اسلامی تاریخ کا گراں قدر اور تاریخ ساز باب ہے، حق حسین سے زندہ رہتا ہے اور باطل داغ ملامت لے کر مرجاتا ہے۔ حق وباطل کا معرکہ روز ازل سے برپا ہے مگر واقعہ کربلا سوز سے لکھا اور اشک بار آنکھوں سے پڑھا جاتا ہے۔

وزیراعلیٰ پنجاب کا کہنا تھا کہ حق کے لئے جینے اور حق کے لئے ہی مرنے والے دلوں میں ہمیشہ زندہ رہتے ہیں۔ حضرت امام حسینؓ نے ثابت کردیا کہ حق کی سربلندی کےلئے بڑی سے بڑی قربانی سے گریز نہ کرنا مردان حق کا شیوہ ہے۔

مریم نواز کہتی ہیں کہ حضرت امام حسینؓ اور ان کے ساتھی حق اور سچ کی راہ پر چلنے والوں کے لئے مینارہ نور ہیں۔ حضرت امام حسینؓ نے میدان کربلا میں جرات و شجاعت کی بے مثال تاریخ رقم کی۔

انہوں نے مزید کہا کہ آج غزہ میں پھر کربلا کی تاریخ دہرائی جارہی ہے، داستان کربلا رہتی دنیا تک مظلوم قوموں کو جرات وحوصلہ عطا کرتی رہے گی۔ یوم عاشور پر ہمیں حضرت امام حسینؓ کی روشن تعلیمات پر عمل پیرا ہونے کا اعادہ کرنا ہے۔