ترجمان پاک فوج احمد شریف چوہدری نے کہا کہ مضبوط لابی ہے جس کے بہت سے اسٹیک ہیں، اس لیے آپریشن عزمِ استحکام کے خلاف مہم چلائی جا رہی ہے، عزمِ استحکام آپریشن کو متنازع بنانا مافیا کی چال ہے، عزمِ استحکام کے خلاف بحث اورکنفیوژن کیوں پھیلائی جا رہی ہے۔ مضبوط لابی چاہتی ہے کہ دہشت گردی کے خلاف مقاصد کامیاب نہ ہوں۔

ڈی جی آئی ایس پی آرنے کہا کہ ہمارا المیہ ہے کہ ہرسنجیدہ معاملے کا سیاست کی وجہ سے مذاق بنایا جاتا ہے، پاکستان میں کوئی نوگو ایریا نہیں، عزم استحکام سے متعلق 24 جون کو وزیرِاعظم آفس سے ایک بیان جاری کیا گیا، عزم استحکام فوجی آپریشن نہیں، اس کو متنازع کیوں بنایا جا رہا ہے؟ دہشت گردی کے خلاف جنگ شدت کے ساتھ لڑی گئی، چارسے پانچ آپریشن ہم ہر گھنٹے میں کررہے ہیں، 16 ہزارمدارس رجسٹرڈ ہیں، اب بھی 50 فیصد مدارس رجسٹرڈ نہیں، کیا یہ فوج نے کرنا ہے؟ تقریباً 32 ہزار سے زائد مدارس پاکستان میں ہیں، ان کے علاوہ دیگر مدارس کہاں ہیں؟ کون ان کو چلا رہا ہے ، نیکٹا کے مطابق کے پی میں اے ٹی سی کورٹس 13 اور بلوچستان میں 9 ہیں۔

انہوں نے کہا کہ افواج پاکستان کا مؤقف واضح کرنا ہے، 22 ہزار 409 چھوٹے بڑے انٹیلی جنس بیسڈ آپریشنز کیے گئے ہیں، آپریشن کے دوران 31 انتہائی مطلوب دہشت گردوں کی ہلاکت بھی ہوئی، ادارے روزانہ کی بنیاد پر112 آپریشنز انجام دے رہے ہیں، رواں سال 137 افسر اور جوانوں نے ان آپریشن میں جام شہادت نوش کیا، پوری قوم شہید ہونے والے بہادر جوانوں کو خراج تحسین پیش کرتی ہے۔

پریس کانفرنس کے دوران بنوں واقعے کی فوٹیج چلائی گئی

ڈی جی آئی ایس پی آرنے کہا کہ فوٹیج میں دیکھا جاسکتا ہے کہ بہت سے مظاہرین کے پاس اسلحہ ہے، بنوں واقعے میں ہمارے 8 جوان شہید ہوئے، تمام دہشت گردوں کو جہنم واصل کردیا گیا، سپاہی ثوبان نے اپنے آپ کو گرنیڈ پر ڈال دیا تاکہ باقی لوگ بچ جائیں، اگلے دن بنوں کے لوگوں نے کہا ہم امن مارچ کریں گے، اس امن مارچ میں کچھ مسلح لوگ پہلے سے شامل تھے، ایک عارضی دیوار کو بھی وہاں گرایا گیا اور سپلائی ڈپو کو بھی لوٹا گیا، تاجروں کے امن مارچ میں کچھ مخصوص عناصرشامل ہوئے، اس جگہ سے ایک کلومیٹر دور مسلح افراد نے فائرنگ کی اور جانی نقصان ہوا۔

ڈی جی آئی ایس پی آر نے کہا کہ بنوں میں فوج نے ریسپانس ایس او پیزکے مطابق بالکل درست دیا، اگرکوئی انتشاری ٹولہ آتا ہے تو اس کو پہلے وارننگ دی جاتی ہے پھر ہوائی فائرنگ کی جاتی ہے، اگر وہ انتشاری ٹولہ نہ رکے تو پھراس کے ساتھ جو کرنا ہو وہ کیا جاتا ہے، 9 مئی کرنے والے، سہولتکار، منصوبہ سازوں کو ڈھیل دیں گے تو ملک میں یہ فسطایت پھیلے گی۔

ڈی جی آئی ایس پی آر کا کہنا ہے کہ جو دھرنا ہوا، حکومت اورادارے حساسیت اور جذباتیت کو مدنظر رکھتے ہوئے اس کو حل کرنے کی کوشش کر رہے تھے، کل اگر جماعت اسلامی غزہ کے معاملے پرآکر بیٹھے گی تو بھی آپ کہیں گے کہ یہ فوج نے بٹھایا ہے، دھرنے والے آرام سے چلے گئے تو کہا گیا اس کے پیچھے کچھ ہے۔

لیفٹیننٹ جنرل احمد شریف چوہدری نے کہا کہ فیک نیوزاس قدر ہے جس کا جو دل چاہتا ہے وہ کہہ دیتا ہے، سوشل میڈیا پر فوج اور اس کی قیادت کے خلاف باتیں کی جا رہی ہیں، ڈیجیٹل دہشت گردوں کو قانون نے روکنا ہے، ڈیجیٹل دہشت گرد کو قانون کے مطابق سزا دے کر روکنا ہے، ڈیجیٹل دہشت گرد کو کس طرح ڈیل کرنا ہے، اس کو قانون نے روکنا ہے۔ ایک خارجی ٹولہ افغانستان میں بیٹھا ہے، بھارت موقعے کی تاک میں ہے کہ کب پاکستان کی فوج اور ادارے کمزور ہوں اور وہ واردات کرے، اگر یہ سب چلتا رہا اور ہم اس کے سامنے کھڑے نہ ہوئے تو اس کو مزید اسپیس ملے گی، وقت آگیا ہے کہ پوری قوم کو کھڑا ہونا ہے۔

ترجمان پاک فوج نے کہا کہ فلسطین کے معاملے پرحکومت اور فوج کا مؤقف بڑا واضح ہے، فلسطین میں جو ہو رہا ہے وہ نسل کشی ہے، پاکستان کے سفیر منیراکرم نے پاکستانی عوام کے جذبات کی ترجمانی کی، 1118 ٹن امداد غزہ میں بھجوائی جاچکی ہے، فلسطین میں نسل کشی کسی صورت قابل قبول نہیں ہے۔