امیر جماعت اسلامی حافظ نعیم الرحمان نے مقدمات ختم کرکے کارکنوں کی رہائی کا مطالبہ کر دیا۔

لیاقت باغ میں دھرنے کے مقام پر میڈیا سے گفتگو کرتے ہوئے امیر جماعت اسلامی  حافظ نعیم الرحمان نے کہا کہ پنجاب حکومت نے فسطائیت کا مظاہرہ کرتے ہوئے سیکڑوں کارکنوں کو گرفتار کیا۔

حافظ نعیم الرحمان   نے کہا کہ لاہور، اوکاڑہ اور ملتان سمیت کئی علاقوں میں ذمہ داران کو گرفتار کرکے مقدمات درج کیے گئے۔اس وقت بھی دو سو سے زائد کارکن پنجاب میں گرفتار ہیں۔

انہوں نے کہا کہ گرفتاریوں  کے ساتھ مذاکرات نہیں چل سکتے،مقدمات ختم کرکے کارکنوں کو رہا  کیا جائے۔ دھرنا کسی بھی رخ موڑ سکتے ہیں۔

امیر جماعت اسلامی نے کہا کہ مذاکراتی کمیٹی کا اعلان اس وقت کروں گا جب حکومتی کمیٹی تحفظات کو مدنظر رکھ کر واضح ہوگی۔حکومتی ناموں پر کچھ تحفظات ہیں،حکومت ایک گھنٹے میں تحفظات دور کرے ہم کمیٹی کا اعلان  کردیں گے۔

حافظ نعیم الرحمان    کا کہنا تھا کہ  پوری قوم اور نوجوانوں کا مقدمہ لڑ رہے ہیں۔ملک  کے لیے اس سے زیادہ تباہ کن کچھ نہیں ہوسکتا کہ نوجوان مایوس ہو جائے۔امید کا چراغ جلانا اپنا فرض سمجھتے ہیں۔

انہوں نے کہا کہ سرمایہ دار اور حکومتی طبقے نے قوم کو یرغمال بنایا ہوا ہے۔آئی پی پیز خون نچوڑ رہے ہیں ان کو لگام ڈلوانا چاہتے ہیں۔ آئی پی پیز کے سرکردہ لوگ ہر حکومت میں شامل ہوتے ہیں۔

امیر جماعت اسلامی نے کہا کہ حق لیے بغیر دھرنا ختم نہیں ہوگا، واضح کہتا ہوں چار دن بعد جانے والی خام خیالی میں نہ رہیں۔دھرنا تاریخی انقلاب میں تبدیل ہوجائے گا۔

حافظ نعیم الرحمان نے مطالبہ کیا کہ جن آئی پی پیز کے معاہدے ختم ہوگئے انہیں فوری بند کیے جائیں اور  جو پلانٹ کی لاگت سے زیادہ منافع لے چکے ان کا بھی جائزہ لیا جائے۔

ان کا مزید کہنا تھا کہ بجلی کی قیمت کم کروانا چاہتے ہیں کیونکہ لوگ بہت پریشان ہیں۔اب تو صنعتکار بھی کہتے ہیں کہ بل دینے کے قابل نہیں رہے،تاجروں نے ملاقات میں مجھے بتایا کہ فیکٹریاں چلانے کے قابل نہیں رہے۔

امیر جماعت اسلامی نے کہا کہ سب کہتے ہیں ہمیں ڈی چوک جانا چاہیے،ڈی چوک جا سکتے تھے لیکن حکومت نے فساد کرنا تھا۔اب فیصلہ کیا ہے کہ یہاں بیٹھ کر قوم کو آگاہ کریں گے۔

حافظ نعیم الرحمان نے کہا کہ حکومت سمجھتی ہے دھرنا مری روڈ پر ہی ہوگا تو دھرنا پورے ملک میں پھیلے گا اور آگے بھی جائے گا۔لوگوں نے پورے ملک میں امید لگا لی ہے، مایوسی نہیں پھیلانا چاہتے۔

انہوں نے کہا کہ صنعتوں کو چلنے دیا جائے، بجلی کے بل کم کیے جائیں اور جاگیرداروں پر ٹیکس لگائیں۔حکمران اپنی فری بجلی ختم کریں تو غریب اور مڈل کلاس  کے لیے آسانی ہوگی۔

امیر جماعت اسلامی نے کہا کہ تاجر ٹیکس دینا چاہتے ہیں لیکن ایف بی آر کے کرپٹ ڈنڈے کے ذریعے نہیں،  تاجروں سے جماعت اسلامی صرف جائز ٹیکس وصول کرے گی۔

حافظ نعیم الرحما ن کا کہنا تھا کہ  کل بعد نماز مغرب دھرنے کے مقام پر عظیم جلسہ عام ہوگا اور پیر کو خواتین کا جلسہ عام ہوگا۔ہماری خواتین پورے احترام کے ساتھ آئیں گی۔

انہوں نے کہا کہ  مشاورت کا عمل جاری ہے مزید گفتگو بعد میں کریں گے۔