شبلی فراز نے کہا ہے کہ ہمارے آنے والے احتجاج بھی پُرامن ہوں گے، جمعہ کوملک بھرمیں اتحادیوں کے ساتھ مل کراحتجاج کریں گے۔

اسلام آباد میں بھوک ہڑتالی کیمپ پرپی ٹی آئی کے رہنماؤں نے میڈیا سے گفتگوکی، حامد رضا نے کہا کہ جمعہ کوہرصورت نکلیں گے اور بھرپوراحتجاج کریں گے۔

اسد قیصر نے کہا کہ جعلی مینڈیٹ والے فوری مستعفی ہوں، ملک میں نئے الیکشن کرائے جائیں، جوبل آرہے ہیں عوام کی قوت برداشت سے باہرہو گئے ہیں، پی ٹی آئی سیاسی جماعت ہے کس قانون کے تحت دفترپر چھاپہ مارا گیا؟

رہنما تحریکِ انصاف نے کہا کہ عدلیہ پر دباؤ ڈالنے کی کوشش کی گئی، مریم نوازکے بیان کی مذمت کرتےہیں، عدلیہ کےبارے میں توہین آمیزالفاظ استعمال کیے گئے۔

رہنما پی ٹی آئی شبلی فراز نے کہا کہ ہماری بھوک ہڑتال سے کسی کوکوئی تکلیف نہیں پہنچ رہی، ہمارے آنے والےاحتجاج بھی پُرامن ہوں گے، جمعہ کوملک بھرمیں اتحادیوں کےساتھ مل کراحتجاج کریں گے۔

چیئرمین پی ٹی آئی بیرسٹرگوہرنے کہا کہ آج پی ٹی آئی وفد نے اسپیکرسے ان کے چیمبرمیں ملاقات کی، اپنےاراکین اسمبلی کی سیکیورٹی سے متعلق تحفظات کااظہارکیا، پہلی بارآج پارلیمنٹ کی حدود میں 3 گھنٹے کے لیے بھوک ہڑتالی کیمپ لگایا۔ بنیادی حقوق کی فراہمی تک روزانہ بھوک ہڑتالی کیمپ لگائیں گے۔

اپوزیشن لیڈرعمرایوب نے کہا کہ ہم علامتی بھوک ہڑتال کررہے ہیں، بانی پی ٹی آئی کو کہا تھا کہ بھوک ہڑتال نہ کریں، ہمارا مطالبہ ہے آزادانہ اورمنصفانہ انتخابات ہونے چاہئیں، فارم47 کی حکومت کو بچانا ناممکن ہے، فارم47کی حکومت ڈوب چکی ہے، مہنگائی کے باعث ملک میں جینا مشکل ہو گیا ہے