کراچی : شہید ڈی ایس پی علی رضا کے نماز جنازہ انچولی میں قائم امام بارگاہ میں ادا کردی گئی۔

شہید ڈی ایس پی علی رضا کے نماز جنازہ کراچی کے علاقے انچولی میں قائم امام بارگاہ میں ادا کردی گئی ہے جب کہ نماز جنازہ میں اہل خانہ، عزیز و اقارب کی بڑی تعداد نے شرکت کی۔

علاوہ ازیں سی پی او میں بھی نماز جنازہ ادا کی گئی جس میں صوبائی مشیر نجمی عالم، آئی جی پولیس، ڈی جی رینجرز، سول سوسائٹی کے لوگ اور پولیس کی بھی بڑی تعداد شریک ہوئی جب کہ شہید ڈی ایس پی کا جسد خاکی تدفین کے لیے وادی حسین روانہ کردیا گیا ہے۔

ترجمان وزیراعلیٰ سندھ کہتے ہیں کہ ڈی ایس پی علی رضا اور ان کے گارڈ کل حملے میں شہید ہوئے تھے جب کہ وزیراعلیٰ سندھ نے ڈی ایس پی علی رضا کے خاندان سے بھی ملاقات کی۔

ملاقات میں وزیراعلیٰ سندھ نے یقین دہانی کرائی کہ علی رضا کے قاتل جلد گرفتار کر کے ان کو کٹھرے میں لائیں گے، دہشت گردی کے خلاف ہماری پولیس کی بڑی قربانیاں ہیں۔ ڈی ایس پی علی رضا کی قربانی رائیگاں نہیں جائے گی۔

وزیر داخلہ سندھ ضیاءالحسن لنجار نے میڈیا سے گفتگو میں کہا کہ علی رضا کافی عرصے سے سی ٹی ڈی میں کام کررہے تھے، یکم محرم کو یہ واقعہ ہوا ہے اس کو سیکٹریل کلنگ کے تناظر میں بھی دیکھ رہے ہیں۔

انہوں نے بتایا کہ علی رضا نے لیاری گینگ وار اور ٹی ٹی پی کے خلاف کارروائیاں کی، لیاری گینگ وار کی پرانی دشمنی ہوسکتی ہے۔

وزیر داخلہ سندھ نے مزید کہا کہ اس قتل میں جو بھی کردار ہیں وہ منطقی انجام تک پہنچیں گے، پولیس کی قربانیوں کی وجہ سے کراچی کا امن و امان بہتر ہے۔