اسلام آباد: وزیراعظم شہبازشریف کی جانب سے عالمی کریڈٹ ریٹنگ ایجنسی ’فچ‘ کی جانب سے پاکستان کی ریٹنگ ٹرپل سی پلس کرنے پر خیرمقدم کیا گیا ہے۔

وزیراعظم شہباز شریف نے وزیر خزانہ محمد اورنگزیب اور مالیاتی ٹیم کی محنت اور کاوشوں کو سراہتے ہوئے عالمی کریڈٹ ریٹنگ ایجنسی ’فچ‘ کی جانب سے پاکستان کی ریٹنگ ٹرپل سی پلس کرنے پر خیرمقدم کیا۔

وزیراعظم نے کہا کہ ریاست کی خاطر سیاست کی قربانی کا ثمر آج معاشی بہتری کی صورت میں ملک اور قوم کو مل رہا ہے، پاکستان کی عالمی ریٹنگ ٹرپل سی پلَس ہونا درست معاشی پالیسی کا عالمی اعتراف ہے۔

شہباز شریف کا کہنا ہے کہ معاشی اصلاحات کے ایجنڈے پر دن رات کام کررہے ہیں، اس کے ثمرات عوام تک پہنچا کر دم لیں گے، فچ اور دیگر عالمی مالیاتی اداروں کی رپورٹس پاکستان کی معاشی بہتری کے حوالے سے اہم ہیں۔

ان کا کہنا تھا کہ پاکستان کی معاشی بہتری کے راستے پر مزید محنت اور جذبے سے آگے بڑھیں گے، امید ہے آئی ایم ایف کے نئے پروگرام سے پاکستان کی معاشی بہتری اور سرگرمیوں میں مزید اضافہ ہوگا۔

وزیراعظم نے مزید کہا کہ اسٹیٹ بینک کی جانب سے شرح سود میں مزید ایک فی صد کمی کا اعلان بھی معاشی بہتری کی ایک اور جھلک ہے، شرح سود میں کمی سے افراط زر میں مزید کمی ہوگی اور کاروباری سرگرمیوں میں مزید اضافہ ہوگا۔