صدرآصف علی زرداری کو 7 ممالک کے سفرا نے سفارتی اسناد پیش کردیں، زمبابوے، تاجکستان، روانڈا، ارجنٹائن، میانمار، کمبوڈیا اور بوٹسوانا کے سفرا نے اسناد پیش کیں۔

سفرا نے صدرمملکت سے الگ الگ ملاقاتیں بھی کیں، اس موقع پرصدرآصف علی زرداری نے کہا کہ پاکستان میں سرمایہ کاری کے وسیع مواقع موجود ہیں، دوست ممالک پاکستان کے سرمایہ کاری دوست ماحول سے فائدہ اٹھائیں۔

صدرمملکت نے کہا کہ غیرملکی سرمایہ کار پاکستان کے زراعت، لائیو سٹاک، انفارمیشن ٹیکنالوجی، توانائی اور کان کنی کے شعبوں میں سرمایہ کاری کے مواقع تلاش کریں۔ پاکستان تمام دوست ممالک کے ساتھ تجارت، سرمایہ کاری اور ثقافت سمیت مختلف شعبوں میں تعاون کو وسعت دینا چاہتا ہے۔

صدرآصف زرداری نے کہا کہ پاکستان اقتصادی تعاون بڑھانے، دوست ممالک کے ساتھ تجارتی حجم کو بھرپور صلاحیت کے مطابق بڑھانے کو خصوصی اہمیت دیتا ہے۔

صدرمملکت نے سفرا سے اقتصادی اورتجارتی تعلقات کے فروغ کیلئے کاروباری برادریوں کے مابین رابطے بڑھانے پر زوردیا اور سفرا کو پاکستان میں بطورسفیر تعینات ہونے پر مبارکباد دی۔

صدرمملکت نے کہا کہ امید ہے کہ نامزد سفرا باہمی طور پر فائدہ مند تعاون مزید بہتر بنانے میں اپنا کردار ادا کریں گے۔

قبل ازیں، سفرا کو ایوان ِصدر پہنچنے پر پاکستان کی مسلح افواج کے چاق و چوبند دستے نے گارڈ آف آنر پیش کیا۔