یورپی کمیشن کی تحقیقات کے ابتدائی نتائج کے مطابق ایکس کا بلیو ٹک ڈیجیٹل سروسز ایکٹ کی خلاف ورزی کر رہا ہے۔

یورپی کمیشن کی تحقیقات کے ابتدائی نتائج کے مطابق ایلون مسک کی سوشل میڈیا سروس ’ایکس‘ اکاؤنٹس کی ساکھ کے بارے میں صارفین کو گمراہ کر کے یورپی یونین کے قانون کی خلاف ورزی کر رہی ہے۔

یورپی یونین کی ایگزیکٹو باڈی نے گزشتہ روز اعلان کیا ہے کہ ایکس پر نیلے رنگ کا ’بلیوٹک‘ ڈیجیٹل سروسز ایک کی خلاف ورزی ہے۔

ایگزیکٹو باڈی کے مطابق معروف ٹیکنالوجی فرموں کو جعلی معلومات اور غیر قانونی مواد کے خلاف اقدامات کرنے کی ضرورت ہے۔

واضح رہے کہ ایکس پر بلیو ٹک کا نشان اس بات کی تصدیق کے لیے استعمال کیا جاتا ہے کہ بااثر لوگوں اور تنظیموں کے ایکس اکاؤنٹس مستند ہیں۔

یورپی کمیشن کا کہنا ہے کہ اب فیس ادا کرنے والا کوئی بھی صارف چند شرائط پوری کرکے بلیو ٹک حاصل کر سکتا ہے، جو خطرناک بات ہے۔

بعض بلیو ٹک کے حامل ایکس اکاؤنٹس آزادانہ اور باخبر فیصلے کرنے کی صلاحیت کو منفی طور پر متاثر کر سکتے ہیں، اور صارفین کو دھوکہ دینے کے لیے تصدیق شدہ اکاؤنٹ کا غلط استعمال کر سکتے ہیں۔

یورپی کمیشن کے مطابق ایکس کو ایگریکٹو باڈی کی ابتدائی تحقیقات کو چیلنج کرنے کا حق حاصل ہے۔

رپورٹس کے مطابق اگر ایکس یورپی یونین کے قانون کی خلاف ورزی کا مرتکب پایا گیا تو اس پر اسکی سالانہ عالمی فروخت کا 6 فی صد تک جرمانہ عائد ہو سکتا ہے۔