کالعدم ٹی ٹی پی کے سرغنہ خارجی نور ولی محسود کی حالیہ خفیہ کال  لیک کا فورنزک کروانے کے بعد نور ولی کے خلاف  سخت قانونی چارہ جوئی کا فیصلہ کرلیا گیا۔

19 جولائی کو خارجی نور ولی کی خفیہ کال منظر عام پر آئی تھی جس میں وہ  خوارجی احمد حسین عرف غٹ حاجی کو اسپتالوں، سرکاری املاک اور اسکولوں کو دھماکے سے اڑانے کی ہدایات دے رہا ہے۔

کال میں پولیس اور فوجیوں کے گھروں کو مسمار کرنے کی واضح ہدایات  بھی سنی جا سکتی ہیں۔

میڈیا پر خبر کے بعد   شدید عوامی رد عمل  آنے پر  خوارجی ٹولے  نے خفیہ کال کو اے آئی جنریٹیڈ قرار دے کر راہ فرار کی کوشش کی۔

ذرائع کا کہنا ہے کہ متعلقہ حکام نے نور ولی اور غٹ حاجی کی خفیہ آڈیو لیک کا آفیشل فورنزک کروانے کا فیصلہ کر لیا۔ اِس اہم کال کی فورنزک رپورٹ کے بعد نور ولی اور غٹ حاجی کے خلاف  کری شموزئی ڈیرہ اسماعیل خان  کے دیہی ہیلتھ سینٹر میں   15،16 جولائی کو معصوم بچوں اور عورتوں کو شہید کرنے پر ان خارجیوں کے خلاف ملک کے اندر اور باہر سخت  قانونی چارہ جوئی کی جائے گی۔

خارجی ٹولے اور نور ولی کی افغانستان میں مسلسل موجودگی اور وہاں سے بیٹھ کر پاکستان میں براہِ راست دہشت گردی کروانے پر افغان انٹیرم گورنمنٹ سے شدید احتجاج بھی کیا جائے گا۔

اِن خوارجی دہشت گردوں کو ریاستِ پاکستان کے خلاف مسلسل دہشت گردی اور سنگین جرائم کرنے پر  افغانستان سے اِن خوارجیوں کو پاکستان کے حوالے کرنے کا فوری مطالبہ بھی کیا جائے گا۔

افغانستان کی سر زمین پاکستان کے خلاف مسلسل استعمال ہو رہی ہے اور انٹیرم افغان حکومت خوارجی ٹولے کی دہشت گردانہ سرگرمیوں کو روکنے میں مکمل ناکام ہو چکی ہے۔

دہشت گردی کی لعنت کو جڑ سے  اکھاڑنے کے لئے پاکستان ہر ممکن حد تک جائے گا تاکہ اِس ناسور سے نجات حاصل کی جا سکے۔