پشاور: خیبرپختونخوا کے مختلف اضلاع میں حالیہ بارشوں کے باعث حادثات کے نتیجے میں 19 افراد جاں بحق اور 15 افراد زخمی ہوگئے۔

پی ڈی ایم اے نے خیبرپختونخوا میں ہونے والی حالیہ بارشوں کے باعث حادثات کی رپورٹ جاری کردی ہے جس کے مطابق پشاور سمیت مختلف اضلاع میں 19 افراد جاں بحق جب کہ 15 زخمی ہوگئے اور 61 گھروں کو نقصان پہنچا۔

پی ڈٰ ایم اے کی رپورٹ کے مطابق جاں بحق ہونے والوں میں 4 مرد، 4 خواتین اور 11 بچے شامل ہیں جب کہ زخمیوں میں 6 مرد، 3 خواتین اور 6 بچے شامل ہیں۔

پی ڈی ایم اے کے مطابق تیر آندھی اور بارش کے باعث مجموعی طور پر 61 گھروں کو نقصان پہنچا جن میں 37 گھروں کو جزوی اور 24 گھروں کو مکمل نقصان پہنچا۔

پی ڈی ایم اے کا کہنا ہے کہ تیز بارشوں کے باعث جانی و مالی حادثات صوبے کے مختلف اضلاع کوہاٹ ، باجوڑ، چترال اپر و لوئر، دیر اپر، کوہستان اپر و لوئر، ایبٹ آباد، ہری پور، سوات، چارسدہ، صوابی، جنوبی وزیرستان اور ہنگو میں رونما ہوئے۔

پی ڈی ایم اے نے مزید کہا کہ متاثرہ علاقوں میں امدادی کارروائیاں جاری ہیں، بند شاہراہوں کو کھولنے کے لیے چھوٹی بڑی مشنری کو بروئے کار لایا جا رہا ہے۔

پی ڈی ایم اے کی جانب سے متاثرہ اضلاع کی ضلعی انتظامیہ کو متاثرین کو جلد مالی و امدادی معاونت فراہم کرنے کی بھی ہدایت کی گئی ہے۔